सिमकोटमा गाउँपालिका स्तरीय अध्यक्ष कप प्रतियोगिता कात्तिक २२ गतेदेखि

सिमकाेट ।            गाउँपालिका स्तरीय अध्यक्ष कप खेलकुद प्रतियोगिता आगामी कात्तिक २२ गतेदेखि सुरु हुने भएको छ। राष्ट्रपति रनिङ शिल्ड प्रतियोगिता नहुने भएपछि सिमकोट गाउँपालिकाले यस वर्ष पहिलो पटक अध्यक्ष कप सञ्चालन गर्न लागेको हो।

सिमकोट गाउँपालिका शिक्षा, युवा तथा खेलकुद शाखाका प्रमुख कृष्ण प्रसाद आचार्यका अनुसार, प्रतियोगिताको तयारी पूरा भएको छ।

उनका अनुसार गाउँपालिकाभित्रका सातै माध्यमिक विद्यालयलाई परिपत्र गरिएको छ र सबै विद्यालयले सहभागिता जनाउने जानकारी प्राप्त भएको छ।

प्रतियोगितामा ट्र्याक, फिल्ड र भलिबल गरी तेह्र वटा खेलहरू समावेश छन्। ती सबै खेलहरूमा छात्र र छात्रा बीच छुट्टाछुट्टै प्रतियोगिता हुनेछन्।

प्रतियोगिता कात्तिक २२ गतेदेखि २९ गतेसम्म सञ्चालन हुने छ। खेल प्रतियोगिताका लागि गाउँपालिकाले आर्थिक सहयोग गर्नेछ भने रामदेव माध्यमिक विद्यालयले आयोजना गर्ने जिम्मेवारी लिएको छ।