हिल्दुम विद्युत वितरण केन्द्र पाँच दिनका लागि बन्द

सिमकोट ।      सदरमुकाम सिमकोट र खार्पुनाथ गाउँपालिकामा विद्युत आपूर्ति गर्दै आएको हिल्दुम विद्युत वितरण केन्द्रले पाँच दिनका लागि आफ्नो सेवा बन्द गर्ने भएको छ।

केन्द्रका प्रमुख इन्जिनियर जितेन्द्र शाहका अनुसार, पावर हाउससहितका संरचनामा मर्मत आवश्यक भएकाले अस्थायी रूपमा विद्युत आपूर्ति बन्द गर्न लागिएको हो।

उनका अनुसार, पावर हाउसको इन्टेक, फर्बे र ओभरफ्लो भागको मर्मत कार्यका लागि कात्तिक २३ गतेदेखि २७ गतेसम्म विद्युत आपूर्ति पूर्ण रूपमा बन्द गरिनेछ।

मर्मत सम्पन्न भएपछि नियमित रूपमा पुनः विद्युत आपूर्ति सुचारु गरिने जानकारी पनि उनले दिएका छन्।

मर्मतका कारण उपभोक्ताहरूलाई पर्ने असुविधाप्रति केन्द्रले क्षमायाचना गरेको छ।