चिसोबाट जोगाउन रोकायाद्वारा बालमन्दिर माविलाई ८१ मिटर प्रि–फोम सहयोग

सिमकोट ।           बालमन्दिर माध्यमिक विद्यालयका विद्यार्थीलाई चिसोबाट जोगाउन नेपाली कांग्रेस हुम्लाका पूर्व सभापति तथा कांग्रेस कर्णाली प्रदेश समिति सदस्य जयपति रोकायाले विद्यालयलाई ८१ मिटर प्रि–फोम सहयोग गरेका छन्।

विद्यालय भवन पुनर्निर्माणका क्रममा भत्काइएपछि कक्षा ४ देखि १० सम्मका विद्यार्थी अहिले काठ र जस्तापाताको अस्थायी कटेरामा अध्ययन गर्दै आएका छन्।

चिसो मौसममा हावा र चिसोका कारण विद्यार्थीहरूको अध्ययनमा कठिनाइ देखिएपछि रोकायाले व्यक्तिगत पहलमा प्रि–फोम सहयोग गरेका हुन्।

सहयोग हस्तान्तरण कार्यक्रममा बोल्दै रोकायाले भने मैले पनि यही विद्यालयमा आफ्ना बाल्यकालका दिन बिताएको हुँ। त्यो बेला पनि हिउँदमा कक्षाभित्र बस्दा हातले कलम समाउन गाह्रो हुने गरी चिसो हुन्थ्यो।

अहिले पनि बालबालिका त्यही अवस्थाबाट गुज्रिनु परिरहेको देख्दा पीडा भयो। विद्यार्थीहरूलाई केही सहज होस् भन्ने उद्देश्यले यो सहयोग गरेको हुँ।

रोकायाले आफ्नो सानो प्रयासले पनि विद्यालय र बालबालिकाको भविष्यमा सकारात्मक परिवर्तन ल्याउन सक्ने विश्वास व्यक्त गरे।
बालबालिकाको मुस्कान नै हाम्रो खुशी हो उनले थपे।

विद्यालय व्यवस्थापन समितिका अध्यक्ष धर्मराज बोहराले विद्यालय परिवारको तर्फबाट रोकायाप्रति आभार व्यक्त गर्दै भने उहाँको सहयोगले कक्षाभित्र हावा र चिसो रोक्न मद्दत पुग्नेछ। यसले विद्यार्थीहरूको अध्ययन वातावरण केही सहज बन्ने अपेक्षा गरिएको छ।

उनका अनुसार, रोकायाले गरेको यो सहयोग विद्यालयका लागि न्यानोपन र आशाको प्रतीक  बनेको छ।

सिमकोटको कठोर चिसो मौसममा काठ र जस्तापाताको अस्थायी कटेराभित्र अध्ययन गर्न बाध्य विद्यार्थीहरूका लागि यो सहयोग सहानुभूति, प्रेरणा र अर्थपूर्ण उपहार बनेको विद्यालयले जनाएको छ।