अवैध रूपमा भित्र्याइएको चिनियाँ मदिरा प्रहरीले बरामद

   सिमकोट ।      हुम्ला जिल्लाको उत्तरी नाका हिल्साबाट अवैध रूपमा भित्र्याइएको ठूलो परिमाणको चिनियाँ मदिरा प्रहरीले नियन्त्रणमा लिएको छ।

जिल्ला प्रहरी कार्यालय हुम्लाको टोलीले मंगलबार नाम्खा र सिमकोट गाउँपालिकाका विभिन्न स्थानमा लुकाइछिपाई राखिएको ३ सय ५१ कार्टुन चिनियाँ मदिरा बरामद गरेको हो।

जिल्ला प्रहरी प्रमुख डिएसपी शंकर पोखरेलको नेतृत्वमा गएको टोलीले खोजतलासी तथा निगरानीका क्रममा मदिरा फेला पारेको हो। बरामद मदिरा विभिन्न घर, गोठ र गोदाममा लुकाइराखिएको अवस्थामा भेटिएको प्रहरीले जनाएको छ।

प्रहरीका अनुसार बरामद ३५१ कार्टुनमा ४ हजार २ सय १२ बोतल चिनियाँ मदिरा रहेका छन्, जसको बजार मूल्य करिब २१ लाख ६ हजार रुपैयाँ बराबर हुन्छ।

प्रारम्भिक अनुसन्धानबाट ती मदिरा हिल्सा नाकाबाट अवैध रूपमा भित्र्याइएका र स्थानीय व्यापारीहरूले नाम्खा तथा सिमकोट क्षेत्रका विभिन्न स्थानमा लुकाइराखी हुम्लाका अन्य बजारमा पठाउने तयारी गरेको जानकारी प्रहरीले पाएको छ।

सीमावर्ती क्षेत्रमा अवैध रूपमा मदिरा, सामान र उपभोग्य वस्तुहरू भित्र्याउने प्रवृत्ति रोक्न प्रहरीको निगरानी अझै कडा पारिएको जिल्ला प्रहरी प्रमुख पोखरेलले बताए।

बरामद गरिएको मदिरा हाल सिमकोट ल्याई आवश्यक कानूनी प्रक्रिया अगाडि बढाइएको र घटनाबारे थप अनुसन्धान भइरहेको प्रहरीले जनाएको छ।