हिल्दुम गाउँमा सामुदायिक स्वास्थ्य इकाई कार्यालय स्थापना

हुम्लाको सिमकोट गाउँपालिका वडा चारमा रहेको हिल्दुम गाउँमा पहिलो पटक सामुदायिक स्वास्थ्य इकाई स्थापना गरिएको छ । स्वास्थ्य सेवाबाट कोही पनि नागरिक बञ्चित नहुन भन्ने उदेश्यले स्वास्थ्य इकाई स्थापना गरिएको हो ।

शनिबार एक कार्यक्रमका विच वडा चारका वडाध्यक्ष छविचन्द्र लामाको अध्यक्षमा र जिल्ला अस्पतालका सिनियर अनमी सरिता बोहराको प्रमुख आथित्यमा सामुदायिक स्वास्थ्य इकाई कार्यालय उद्घाटन गरेर स्थापना गरीएको हो ।

कर्णाली प्रदेश सरकारको सहयोगमा पुरानो बालविकास विद्यालयको भवनको एक कोठामा स्वास्थ्य इकाई स्थापना गरीएको हो । भवन बनाउँदा सम्मका लागी उक्त विद्यालयको एक कोठाबाट सेवा प्रदान गरीने भएको छ ।

आजै स्थापना भएको उक्त स्वास्थ्य इकाई कार्यालयमा तीन जना कर्मचारीको दरबन्दी इकाई प्रमुख कबिन्द्र शाहीले जानकारी दिनुभयो । एकजना अहेब, एकजना अनमी र एक जना कार्यालय सहयोगी गरेर तीनजना कर्मचारीको दरबन्दी रहेको शाहीले जानकारी दिए ।

घरदैलोमै स्वास्थ्य सेवा दिन खोलिएको इकाई स्वास्थ्य चौकीको पहुँच बाहिर रहेका यहाँका सर्वसाधरणलाई राहत दिने वडाध्यक्ष छविचन्द्र लामाले बताए । स्वास्थ्य संस्था नभएको कारण यहाँका स्थानीय बासिन्दा सामान्य विरामी हुँदा स्वास्थ्य सेवा लिन जिल्ला सदरमुकाम सिमकोट पुग्नुपर्ने बाध्यता रहेको थियो । स्वास्थ्य संस्था नभएको यस वडामा सामुदायिक स्वास्थ्य इकाई सञ्चालनमा ल्याइएको वडाध्यक्ष लामाले बताए ।

नयाँ संरचना अनुसार स्वास्थ्य संस्था नभएका वडाहरुमा आवश्यक जनशक्तिको दरबन्दी सहित सामुदायिक स्वास्थ्य इकाई स्थापना गर्ने क्रममा वडा ४ मा पनि प्रदेश सरकारले नै कार्यक्रम स्वीकृत गरे अनुरुप सामुदायिक स्वास्थ्य इकाई स्थापना गरिएको हो ।

इकाई स्थापना भएपछि यहाँका सर्वसाधारण हर्षित भएका छन् । स्वास्थ्य सेवा लिन आधि घण्टाको पैदल हिडेर सदरमुकाम सिमकोट पुग्नुपर्ने बाध्यता यहाँका स्थानीयलाई अबका दिनबाट हट्ने भएको छ । जटिल विरामीका बाहेक अन्य सम्पुर्ण सेवा स्वास्थ्य इकाईबाट नै गरीने भएको प्रमुख शाहीले बताए ।