सिमकोट गाउँपालिकाको आर्थिक वर्ष २०८२÷८३ को वार्षिक प्रगति समीक्षा कार्यक्रम सम्पन्न

सिमकोट, हुम्ला । 

सिमकोट गाउँपालिकाले आर्थिक वर्ष २०८२÷८३ मा सम्पादन गरेका विकास निर्माण, सेवा प्रवाह तथा विभिन्न क्षेत्रका उपलब्धिहरूको समीक्षा गर्दै वार्षिक प्रगति समीक्षा कार्यक्रम सम्पन्न गरेको छ । गाउँपालिकाका अध्यक्ष विजय भण्डारीको अध्यक्षतामा आयोजित कार्यक्रममा आर्थिक वर्षभरि सञ्चालन भएका योजना, कार्यक्रम र सेवा प्रवाहको समग्र समीक्षा गरिएको हो । 

कार्यक्रमका प्रमुख अतिथि जिल्ला समन्वय समिति हुम्लाका उपप्रमुख दलु फडेराले कार्यक्रमको ब्यानर वाचन गरी औपचारिक उद्घाटन गर्नुभयो । समीक्षा कार्यक्रममा सिमकोट गाउँपालिकाअन्तर्गत रहेका सबै शाखाले आर्थिक वर्ष २०८२÷८३ मा सम्पन्न गरेका गतिविधि, उपलब्धि, चुनौती तथा आगामी कार्ययोजना सहित आफ्नो वार्षिक प्रगति विवरण प्रस्तुत गरेका थिए । शिक्षा शाखाले विद्यालय व्यवस्थापन, शिक्षक क्षमता विकास र शैक्षिक सुधारका कार्यक्रमबारे जानकारी दिएको थियो भने स्वास्थ्य शाखाले आधारभूत स्वास्थ्य सेवा, खोप, मातृ तथा शिशु स्वास्थ्य, पोषणलगायतका कार्यक्रमको प्रगति प्रस्तुत गरेको थियो ।

त्यसैगरी कृषि शाखाले कृषक लक्षित अनुदान, उत्पादन वृद्धि तथा व्यवसायिक खेती प्रवद्र्धनका कार्यक्रमबारे जानकारी गराएको थियो । रोजगार शाखाले प्रधानमन्त्री रोजगार कार्यक्रम तथा स्थानीय रोजगारी सिर्जनाका गतिविधिहरू प्रस्तुत गरेको थियो । पञ्जीकरण शाखाले व्यक्तिगत घटना दर्ता तथा सामाजिक सुरक्षा कार्यक्रमको प्रगति विवरण राखेको थियो । साथै पोषण, लिप्स लगायत अन्य शाखाहरूले पनि आफ्नो वार्षिक कार्यसम्पादन, उपलब्धि र आगामी सुधारका पक्षहरू प्रस्तुत गरेका थिए ।

कार्यक्रममा प्रस्तुत प्रतिवेदनमाथि सहभागीहरूले सुझाव, जिज्ञासा र अनुभव आदानप्रदान गरेका थिए । विभिन्न शाखाले भोगेका चुनौती, स्रोत–साधनको अवस्था तथा आगामी आर्थिक वर्षमा सेवा प्रवाहलाई अझ प्रभावकारी बनाउने विषयमा समेत छलफल भएको थियो ।

समीक्षा कार्यक्रममा सिमकोट गाउँपालिकाका आठवटै वडाका वडा अध्यक्ष, कार्यपालिका सदस्य, वडा सदस्य, गाउँपालिकामा कार्यरत कर्मचारी तथा सञ्चारकर्मीहरूको सहभागिता रहेको थियो ।