सिमकोट गाउँपालिकाको ९ करोड भन्दा बढी बेरुजु

हुम्ला
हुम्लाको सिमकोट गाउँपालिकाको बेरुजु रकम ९ करोडभन्दा बढी पुगेको तथ्य सार्वजनिक भएको छ । महालेखा परीक्षकको कार्यालयले शुक्रबार राष्ट्रपतिलाई बुझाएको ६३ औँ वार्षिक प्रतिवेदन अनुसार गाउँपालिकाको हालसम्मको अध्यावधिक बेरुजु रु ९ करोड ५ लाख १५ हजार पुगेको उल्लेख गरिएको छ ।

प्रतिवेदन अनुसार सिमकोट गाउँपालिकामा यस आर्थिक वर्षमा रु १ करोड ६९ लाख ३२ हजार नयाँ बेरुजु देखिएको छ । जसमा असुल गर्नुपर्ने रकम रु १ लाख ६३ हजार, प्रमाण कागजात पेश गर्नुपर्ने रु ६ लाख २७ हजार, नियमित गर्नुपर्ने रकम रु १ करोड २५ लाख ७ हजार तथा पेश्की बाँकी रु ३६ लाख ३५ हजार रहेको उल्लेख छ ।

महालेखा परीक्षकको कार्यालयका अनुसार गत वर्षसम्म गाउँपालिकामा रु ७ करोड ४३ लाख १२ हजार बेरुजु बाँकी रहेको थियो । चालु वर्षमा रु ७ लाख २९ हजार फस्र्यौट भएपछि हालसम्मको अध्यावधिक बेरुजु रु ९ करोड ५ लाख १५ हजार पुगेको प्रतिवेदनमा जनाइएको छ ।

प्रतिवेदनले यस गाउँपालिकाको वित्तीय विवरणमा पनि कमजोरी औंल्याएको छ । गाउँपालिकाले नेपाल सार्वजनिक क्षेत्र लेखामानको ढाँचामा वित्तीय विवरण तयार गरेपनि सम्पत्ति, राजश्व तथा अन्य महत्वपूर्ण विवरण पूर्णरूपमा खुलाउन नसकेको महालेखा परीक्षकको कार्यालयले जनाएको छ ।

बेरुजु वर्गीकरण, अध्यावधिक बेरुजुको अवस्था तथा सम्परीक्षणसम्बन्धी विवरण समेत प्रतिवेदनमा समावेश गरिएको छ । गाउँपालिकाको वित्तीय पारदर्शिता र खर्च व्यवस्थापन प्रभावकारी बनाउन आवश्यक सुधार गर्नुपर्ने सुझाव प्रतिवेदनमा दिइएको छ ।