सिमकोट गाउँपालिका पूर्ण खोप दिगोपना सुनिश्चित घोषणा

सिमकोट, हुम्ला ।
हुम्लाको सिमकोट गाउँपालिकालाई पूर्ण खोप दिगोपना सुनिश्चित गाउँपालिका घोषणा गरिएको छ । गाउँपालिकाका आठ वटै वडालाई पूर्ण खोप घोषणा गरिसकेपछि एक औपचारिक कार्यक्रमका बीच सिमकोट गाउँपालिकालाई पूर्ण खोप दिगोपना सुनिश्चित घोषणा गरिएको हो ।

जिल्ला समन्वय समितिको सभाहलमा आयोजना गरिएको कार्यक्रममा सिमकोट गाउँपालिकाका अध्यक्ष विजय भण्डारीको अध्यक्षतामा पालिकालाई पूर्ण खोप दिगोपना सुनिश्चित घोषणा गरिएको हो । कार्यक्रममा जनप्रतिनिधि, स्वास्थ्यकर्मी, महिला स्वास्थ्य स्वयंसेविका तथा सरोकारवाला निकायका प्रतिनिधिको सहभागिता रहेको थियो ।

आर्थिक वर्ष २०८२÷८३ मा सिमकोट गाउँपालिकाभित्र रहेका जन्मदेखि २३ महिनासम्मका बालबालिकामध्ये ९५ प्रतिशत बालबालिकाले सरकारले तोकेका सबै प्रकारका खोप प्राप्त गरेको तथ्यांक प्रस्तुत गरिएको छ । नियमित खोप सेवाको पहुँच विस्तार गर्दै सबै बालबालिकालाई खोपको दायरामा ल्याउने अभियान सफल भएपछि गाउँपालिकालाई पूर्ण खोप दिगोपना सुनिश्चित घोषणा गरिएको हो ।

पूर्ण खोप गाउँपालिका घोषणा गर्न स्वास्थ्यकर्मी तथा महिला स्वास्थ्य स्वयंसेविकाको महत्वपूर्ण भूमिका रहेको कार्यक्रममा जानकारी दिइएको छ । गाउँ–गाउँमा पुगेर बालबालिकाको अवस्था पहिचान गर्ने, खोप छुटेका बालबालिकाको खोजी गर्ने र खोप लगाउन प्रेरित गर्ने काममा स्वास्थ्यकर्मी तथा स्वयंसेविकाले सक्रिय भूमिका निर्वाह गरेका थिए ।

‘खोज र खोप’ भन्ने अभियानका साथ सञ्चालन गरिएको कार्यक्रमले खोपबाट वञ्चित हुन सक्ने बालबालिकालाई पहिचान गरी आवश्यक खोप उपलब्ध गराउन सहयोग पुगेको सिमकोट गाउँपालिकाले जनाएको छ । बालबालिकालाई रोगबाट सुरक्षित राख्न नियमित खोप सेवा अत्यन्त महत्वपूर्ण रहेको स्वास्थ्य बताइएको थियो । 

सिमकोट गाउँपालिकाका स्वास्थ्य संयोजक नरबहादुर भण्डारीले ‘पूर्ण खोप, सुरक्षित भविष्य’ भन्ने मूल नाराका साथ प्रत्येक वडामा अभियान सञ्चालन गरिएको बताउनुभयो । उहाँले बालबालिकाको स्वास्थ्य सुरक्षाका लागि खोप कार्यक्रमलाई निरन्तरता दिँदै आगामी दिनमा पनि कुनै बालबालिका खोपबाट वञ्चित नहुने गरी काम गरिने बताउनुभयो ।

पूर्ण खोप दिगोपना सुनिश्चित घोषणाले गाउँपालिकाको स्वास्थ्य क्षेत्रमा सकारात्मक सन्देश दिएको सहभागीले बताएका छन् । बालबालिकाको स्वास्थ्य अधिकार सुनिश्चित गर्न स्थानीय तह, स्वास्थ्य संस्था, स्वास्थ्यकर्मी र समुदायबीचको सहकार्य आवश्यक रहेको कार्यक्रममा जोड दिइएको थियो ।

सिमकोट गाउँपालिकाले अब नियमित खोप सेवालाई थप प्रभावकारी बनाउँदै छुटेका बालबालिकाको खोजी तथा खोप अभियानलाई निरन्तरता दिने जनाएको छ । बालबालिकाको सुरक्षित भविष्य निर्माणका लागि पूर्ण खोप अभियानलाई दिगो बनाउन सबै पक्षको निरन्तर सहयोग आवश्यक रहेको बताइएको छ ।