सर्केगाड गाउँपालिकाको वडा पाँच सिल

जिल्लाको मध्ये क्षेत्रमा रहेको सर्केगाड गाउँपालिकामा चार जना स्थानीयमा कोरोना संक्रमण पुष्टि भएको छ । वडा पाँचमा आज १५ जनामा एन्टिजेन विधिबाट कोरोना परीक्षण गर्दा चार जनामा संक्रमण पुष्टि भएको जानकारी प्राप्त भएको छ । आज संक्रमण पुष्टि भएका चार जना सबै पुरुष रहेका छन् । संक्रमणको दर थप फैलिन नदिका लागी आजबाट दश दिन सम्मका लागी वडा पाँचलाई सिल गरीएको गाउँपालिका अध्यक्ष कृष्ण रोकायाले जानकारी दिनुभयो ।

चारजनामा संक्रमण देखिए लगत्तै सिल गरीएको अध्यक्ष रोकायाले जानकारी दिए । जिल्ला बाहिरबाट आएका नागरीकमा कोरोना नदेखिएर गाउँमा रहेका स्थानीयमा संक्रमण देखिएको उनले बताए । गाउँपालिकामा उपलब्ध भएसम्मका स्वास्थ्य उपकरणबाट संक्रमितहरुको चेकजाँच भईरहेको छ । आजबाट सिल भएपछि एक घरबाट अर्को घरमा समेत जानलाई रोक लगाईनुका साथै गउँमा स्वयम सेवक परिचालन गरीएको गाउँपालिका अध्यक्ष रोकायाले बताए ।

गाउँपालिकामा रहेका प्रत्येक वडाहरुमा प्ररिक्षणको गरीने भएको र यसको दायरालाई बढाईने भएको उनको भनाई छ । गाउँपालिकाले खरिद गरेका आइसोलेशन बेडका सामाग्री बाटोमा आउँदै गरेकाले गाउँमा पुगेपछि थप व्यवस्थीत बनाइने भएको उनले बताए ।