कोरोना संक्रमणको उच्च जोखिममा सिमकोट

हुम्लामा निषेधाज्ञा खुकुलो बनाएसँगै सदरमुकाम सिमकोटमा संक्रमणको जोखिम बढ्नुका साथै कोरोना संक्रमितको संख्या दैनिक दिन बढ्न थालेको छ ।

गएको असार दोस्रो साता देखि हुम्लामा दैनिक दिन कोरोना संक्रमित पुष्टि हुने गरेका छन् भने संक्रमितको संख्या बढ्दै गएको छ ।

विहिबार जिल्ला अस्पताल हुम्लामा पाँच जनालाई एन्टिजेन विधिबाट परीक्षण गर्दा एक जनामा संक्रमण पुष्टि भएको स्वास्थ्य सेवा कार्यालयका सूचना अधिकारी भक्ति फडेराले जानकारी दिए ।

तीनजना पुरुष दुई जना महिलामा कोरोना परिक्षण गर्दा एक जना पुरुषमा संक्रमण पुष्टि भएको सूचना अधिकारी फडेराले बताए । जिल्लामा हालसम्म एक हजार आठ सय ९२ जनालाई कोरोना परीक्षण गरिएका मध्ये दुई सय ७५ जनामा संक्रमण पुष्टि भएको थियो भने ४८ जना मात्रै सक्रिय संक्रमित रहेका छन । अन्य सबै निको भएर घर गईसकेको बताइएको छ ।

पछिल्लो समय भौतिक दूरी कायम नहुँदा र आवतजावतका क्रममा मास्कको समुचित प्रयोगमा ध्यान नदिँदा पनि जोखिम बढेको स्वास्थ्यकर्मीहरुले बताउने गरेका छन् ।

संक्रमितको संख्यामा कमी देखिए पनि जोखिम यथावत् रहेको जिल्ला अस्पताल हुम्लाका डाक्टर टसी आंजुक लामाले बताए । डाक्टर लामाले भन्नुभयो ‘संक्रमणको जोखिम टरेको छैन , जनस्वास्थ्यका मापदण्डलाई पूर्णतः कार्यान्वयन गर्न आवश्यक छ ।

संक्रमणबाट जोगिन मास्कको समुचित प्रयोग, व्यक्तिगत सरसफाइ र भौतिक दूरी कायम नै अचुक उपाय रहेको बताइएको छ । सिमाकोटमा मानिसहरुको बाक्लो भिडभाडका साथै स्वास्थ्य मापदण्ड पूर्णरुपमा पालना नगर्दा जोखिम बढ्नुका साथै दैनिक दिन संक्रमित पुष्टि हुने गरेको उनले बताए ।

जिल्लाका अन्य गाउँपालिका भन्दा सिमकोट बढी जोखिममा रहेको बताइएको छ । असारमसान्तमा मानिसहरुको सिमकोटमा बाक्लो उपस्थित हुने भएकाले जोखिम बढी रहेको हो । सरकारी कार्यालय बैंक तथा वित्तिय संस्थामा बढी भिडभाड हुनेभएकाले संक्रमण जोखिम थप बढेको जिल्ला अस्पताल हुम्लाले जानकारी दिएको छ । सिमकोटमा विभिन्न कार्यालयबाट रकम निकासा गर्न गाउँघरबाट नागरीकहरुको बाक्लो उपस्थित भएपछि थप जोखिम बढेको हो ।