योजना सम्झौता तिब्र गतिमा भएपछि असारे बिकास नहुने अधिकृत आले

सिमकोट । चालु आर्थिक वर्षको बजेट तथा कार्यक्रमले तर्जुमा गरेका कुल योजना मध्ये हालसम्म पचहत्तर प्रतिशत भन्दा बढी योजनाको सम्झौता कार्य गर्न हुम्लाको सिमकोट गाउँपालिका सफल भएको छ । यसअघि फागुन चैत र वैशाख महिनामा मात्र सम्झौता हुने योजनाहरू यस वर्ष भने अधिकांश योजनाहरू समयमानैै सम्झौता भएर निर्माण कार्य समेत धमाधम भई रहेको पाइएको हो ।

पहिलो पटक गाउँपालिकाले माघ १५ गते सम्म त्रिहत्तर दशमलव २७ प्रतिशत योजनाहरूको गाउँपालिकाले सम्झौता गर्न सफल भएको पमुख प्रशासकिय अधिकृत शुवास आलले बताउनु भएको छ । आफुले १५ गते सोही लिष्ट सार्वजनिक गरेको भएपनि माघ मसान्त सम्मा ७५ प्रतिशत योजनाको सम्झौता भइसकेको बताउनुभयो । यो दर उक्त गाउँपालिकाको गत वर्ष १७ प्रतिशत रहेको थियो । उहाँले गाउँपालिकाले सार्वजनिक सूचना जारी गरेर माघ महिनासम्म सम्झौता गर्नै पर्ने जनाएपछि उपभोक्ताहरू सम्झौताका लागि तातेको बताउनुभयो ।

गाउँपालिका लक्ष शतप्रतिशत योजनाको सम्झौता गर्ने रहे पनि त्यो भने पुरा हुन नसकेको र यति बेला फेरी सम्झौता चाँडो गर्नका लागि सूचना जारी गरिएको बताउनुभयो । चालु आर्थिक वर्षका लागि कुल ११६ वटा योजनाहरू गाउँपालिकाका रहेको र त्यस मध्य माघ मसान्तसम्म ८५ वटाको सम्झौता भएर काम सुरु भई रहेको बताउनु भएको छ । अझै ३१ वटा योजनाहरूको सम्झौता गर्न बाँकी रहेको पाइएको हो । उहाँले पहिलो पटक गाउँपालिका माघ महिना भित्र धेरै योजनाहरूको सम्झौता गरेर निर्माण कार्य अगाडी बढाउन सफलता प्राप्त गरेको बताउँदै गरेपछि हुन्छ भन्ने मान्यता स्थापित भएको बताउनुभयो । विगतका वर्षहरूमा योजनाहरूको सम्झौता कार्य फागुन चैत र वैशाख महिनामा मात्र मात्र हुने गरेको थियो ।

सम्झौता भएका ती योजनाहरूमा ६८ वटा उपभोक्ता र सत्र वटा ठेक्काबाट निर्माण गर्ने रहेका छन । त्यसको ३४ वटालाई पेस्की समेत गई सकेको छ भने १७ वटा योजनाकालागि काम सम्पन्न भएर अन्तिम भुक्तानी समेत गई सकेको अधिकृत आलेले जानकारी दिनु भएको छ । यस पटकको यो प्रयासले गाउँपालिकालाई समयमै योजनाहरू सम्पन्न गर्न सहयोग पुग्ने विश्वास गरिएको बताउनु भएको छ । जिल्लाका अन्य छ वटा गाउँपालिकाहरूको योजना सम्झौता गर्ने कार्य भने भरखर सुरु भएको पाइएको छ । कतिपय गाउँपालिका सम्झौताकालागि बेखबर समेत बन्न पुगेका छन ।