खानेपानी समितिलाई खर्च धान्नै मुस्किल, सिमकोटमा चार सय २५ ग्राहक

सिमकोट । खानेपानी उपभोक्ता समिति सिमकोटले मासिक खर्च धान्नै मुस्कि हुने गरेको बताएको छ । खानेपानी उपभोक्ता समिति सिमकोटमा हाल चार जना कर्मचारी राखिएपनि उनिहरुलाई मासिक तलब खुवाउन समस्या हुने गरेको गुनासो आएको छ । 

सदरमुकाम सिमकोटमा न्युन मात्रै धारा जडान भएका कारण मासिक खर्चसमेत पुग्ने अवस्था नरहेको समितिले जनाएको छ । ग्राहकबाट उठ्ने महसुलबाट मासिक खर्चसमेत धान्न नसक्ने अवस्था रहेको बताइएको छ । तर थोरै मात्र उपभोक्ता समितिको ग्राहक बन्दा मासिक खर्चसमेत धान्न मुस्किल हुने अवस्था देखिएको हो । उपभोक्ता समितिले कर्मचारीको पारिश्रमिक, विद्युत् महसुल खर्च तथा मर्मतसम्भार खर्च धान्नसमेत नसक्ने अवस्था देखिएको छ । 

सदरमुकाम सिमकोटमा खानेपानी समितिले गरेको पाइपलाइन विस्तारअनुसार चार सय २५ घरधुरीसम्म खानेपानीको धारा जडान गरिएका छन् । तर खानेपानी उपभोक्ता समितिले उठाउदै आएको शुल्क सेवाग्राही उपभोक्ताले मासिक नदिने गरेको बताइएको छ ।

सदरमुकाम सिमकोटमा पुराना ग्राहक तीन सय, २५ र नयाँ ग्राहक एक सय रहेका छन् । खानेपानी उपभोक्ता समितिले उनिहरुबाट मासिक रु एक सय रुपैयाँ शुल्क उठाउने गरेको छ । समितिलाई दिने शुल्क ग्राहकले समयमै नदिने गरेको बताइएको छ । सदरमुकाम सिमकोटमा विहान ६ बजेदेखि दश बजेसम्म र दिउँसो तीन बजेदेखि सात बजेसम्म पानी छोड्ने गरेको समितिका सदस्य लोकमणी रावतले बताउनुभयो । सदरमुकाम सिमकोट माथिल्लो बजारमा दुई वटा रिजर्भ ट्यांकी रहेका छन् । पचास, पचास हजारका दुई रिर्जभ ट्यांकी रहेको सदस्य रावतले बताउनुभयो । यस्तै ग्राहकलाई पानी अभाव भएपछि थप ७५ हजार लिटरको ट्यांकी निर्माण भइरहेको बताइएको छ ।