हुम्लामा फैलियो मौसमी रुघाखोकी, अस्पतालमा चाप बढ्यो, एकैदिन १५० को उपचार

सिमकोट । हुम्लाको एक मात्रै जिल्ला अस्पतालमा पछिल्लो समय विरामीको चाप अत्यधिक बढ्न थालेको छ । मौसमी रुघाखोकीका विरामी बढ्दा अस्पतालले धान्न नसक्ने गरी विरामी उपचारका लागि पुग्ने गरेको जिल्ला अस्पताल हुम्लाले जनाएको छ । 

   मौसमी विरामीको चाप अत्याद्यिक बढेसंगै अस्पतालमा विरामी राख्ने शैयाको पनि अभाव हुन थालेको अस्पतालका सिनियर अनमी सरीता बोहराले बताउनुभयो । १५ शैयाको क्षमता भएको हुम्ला अस्पतालमा हिजोआज विरामी बढी भर्ना हुँदा प्रसुती गृह लगायतका वर्डामा समेत राख्ने गरेको अनमी बोहराले बताउनुभयो । आइतबार र सोमबार उपचार गर्न आउने विरामीको संख्या बढ्दा भर्ना भएका कतिपय विरामी अस्पतालमै भर्ना गर्नु पर्दा समस्या हुने गरेको छ । वर्षायाममा हुने मौसम परिवर्तन लगायतका कारण जिल्ला अस्पतालमा विरामीको संख्या बढेपछि बेडको अभाव देखिएको छ । 

   जिल्ला अस्पतालमा धेरै जसो मौसमी रुघाखोकी, ज्वरो, ज्वरोको संक्रमित विरामीहरु आउने गरेको डाक्टर सुनिल पुजाराले बताउनुभयो । यो समय बालबालिकाहरुमा पनि ज्वरोको समस्या बढी देखिएको डाक्टर पुजाराले बताउनुभयो । जिल्ला अस्पताल हुम्लामा आइतबार मात्रै एक, पचास जना विरामीले उपचार गराएका छन् । जसमा सबैभन्दा बढी ज्वरोका विरामी, झाडापखाला, निमोनिया र ग्याष्टिक लगायतका विरामीले उपचार गराएको जिल्ला अस्पतालका डाक्टर पुजाराले बताउनुभयो । यस्तै दोस्रो दिन सोमबार साँझ चार बजेसम्म झण्डै ९० जना विरामीको उपचार गरिएको अस्पताल श्रोतले बताएको छ । केही दिनअघि दैनिक ५० जनासम्म उपचारका लागि पुग्ने गरेको भएपछि पछिल्ला दिनमा मौसमी रुघाखोकी, ज्वरोका विरामी बढ्ने गरेको बताउनुभयो । 

   जिल्ला अस्पतालमा उपचारका लागि सदरमुकाम आसपास गाउँका ठेहे, जोदाम, डाँडाफया, धारापोरी, बुराउँसे, बरगाउँ, यांचु, माजा, छिप्रा लगायतका गाउँबाट पुग्ने गरेका छन् । अहिले जिल्ला अस्पतालमा विरामीको चाप बढेको भएपनि औषधि अभाव नभएको बताइएको छ । यदी यस्तै विरामी बढ्दै जाने र हवाई सेवा अवरुद्ध हुने हो भने औषधिको पनि अभाव हुने अस्पताल श्रोतले बताएको छ ।