हुम्लाका स्थानीय निकायले सामुदायिक वन उपभोक्ता महासंघसँग सहकार्य गर्न आवश्यक

सिमकोट । जिल्लास्थित सात वटा स्थानीय तह र वन सम्बन्धि जिल्लाका काम गर्दै आएका अन्य सरकारी तथा गैरसरकारी कार्यालयले सामुदायिक वन उपभोक्ता महासंघ नेपाल हुम्लासँग सहकार्यका साथ अगाडी बढ्नु पर्ने बताइएको छ ।

जिल्लामा रहेका ९६ वटा सामुदायिक वनलाई आम्दानीका स्रोत बनाउनुका साथै निस्क्रीए भएका वनलाई पनि यहाँका स्थानीय तहले सक्रिय बनाउनु पर्ने सामुदायिक वन उपभोक्ता महासंघ नेपालका जिल्ला संयोजक विनोद फडेराले बताउनुभयो । महासंघको एक्लो प्रयासले जिल्लाका निस्क्रीय वनलाई सक्रिय बनाउन सम्भव नहुने भएकाले सबैको साथ र हातेमालेको आवश्यक रहेको संयोजक फडेराले बताउनुभयो । वन पैदावर खेर गइरहेकाले त्यसको सदुपयोग गर्न वनभित्रै उद्योग बनाउन आवश्यक रहेको उहाँले बताउनुभयो । यसो गरिएमा वन पैदावरहरुपनि खेर नजाने, रोजगारीपनि सिर्जना हुने र स्थानियलाई आम्दानी पनि हुने उहाँको भनाई छ ।

वन पैदावरको सदूपयोग गर्दै उद्यमशिलता विकास गर्ने हो भने खेर गइरहेको वनबाट रोजगारीसँगै आम्दानी पनि हुने उहाँले बताउनुभयो । त्यसो गरेमा वनको समेत संरक्षण हुने उहाँको तर्फ थियो । वनलाई आम्दानीको श्रोत बनाउन यहाँका स्थानीय तहको आवश्यक र सक्रिय भूमिका हुनु पर्ने रावतको भनाई थियो । जिल्ला स्थित सातवटै स्थानीय तहले सक्रियका साथ सामुदायिक वन दर्ताका साथै आफ्नो पालिकामा के कति छन् भनेर एकिन डाटा समेत राखेर अगाडी बढ्नु पर्ने संयोजक फडेराले बताउनुभयो । 

जिल्लाका सातवटै स्थानीय तहमा सामुदायिक वन उपभोक्ता महासंघ सहित फेकोफनले आफ्नो तवरबाट सक्रिय भूमिका निर्वाह गरिरहेको जिल्ला अध्यक्ष राजेन्द्र कार्कीले बताउनुभयो । फेकोफनले यहाँ स्थित विभिन्न स्थानीय तहमा आफ्नो सञ्चालन विस्तारका साथै गाउँपालिका, डिविजन वन कार्यालय लगायतले सहयोग गर्दै आउनु पर्ने अध्यक्ष कार्कीले बताउनुभयो । जिल्लामा ९६ वटा वन मध्ये चालीसवटा भन्दा बढी वन नवीकरण लगायतका विभिन्न कागजी काम पुरा नगरेर सञ्चालनमा आउन नसकेर बन्दको अवस्थामा पुगेका छन् । ती निस्क्रिय वनलाई पनि सक्रिय बनाउनु पर्ने उहाँको जोड थियो ।