स्वाब संकलन शुरु

हुम्लाको सदरमुकाम सिमकोटमा रहेको सिमकोट गाउँपालिकाले क्वारेन्टाइन बसेका नागरीकहरुको शनिवार देखि स्वाब संकलन शुरु गरेको छ ।

शनिबार सिमकोट गाउँपालिकाको वडा नं. चार, पाँच, र छ का क्वारेन्टाइनमा रहेका नागरीकहरुको स्वाब संकलन गरीएको छ । भिटिएम किट आफै खरिद गरेको सिमकोट गाउँपालिकाले शनिबारबाट विभिन्न वडामा स्थापना गरिएका क्वारेन्टिनमा रहँदै आएका व्यक्तिहरुको स्वाब संकलन शुरु गरेको जिल्ला अस्पतालका सुचना अधिकारी भक्ति फडेराले जानकारी दिए ।

सिमकोट गाउँपालिकाका आठ वटै वडामा भएका क्वारेन्टाइनमा ( कोभिड १९) परिक्षणको लागी स्वाब संकलन थालिएको गाउँपालिका स्वास्थ्य शाखाका संयोजक दान बहादुर बोहराले बताए । शनिवार वडा ४,५, र ६ मा रहेका क्वारेन्टाइनमा बस्दै आएका ३ सय २६ जनाको स्वाब संकलन गरीएको हो ।

सुर्खेतमा सबै जिल्लाको स्वाब परिक्षण कार्य गर्नुपर्ने भएको कारण समय लाग्ने देखिएपछि हुम्लाबाट संकलन गरीएका स्वाब कर्णाली स्वास्थ्य विज्ञान प्रतिष्ठान जुम्लामा पठाइने भएको छ । सिमकोट गाउँपालिकामा १३ वटा क्वारेन्टिन रहेका छन् । यस्तै जिल्लाको तल्लो क्षेत्रका गाउँपालिकामा रहेका क्वारेन्टाइनमा बस्दै आएका नागरीकको भने केही समय पछि मात्रै स्वाब संकलन हुनेभएको सुचना अधिकारी फडेराले बताए ।