स्टेचरमा बोकेर ल्याएकी जेष्ठ नागरिकको बनेन राष्ट्रिय परिचयपत्र

सिमकोट         ।   पछिल्लो समय नेपाल सरकारले सबै निकायमा राष्ट्रिय परिचय पत्रलाई अनिवार्य गरेपछि दुर्गम गाँउका जेष्ठ नागरिकहरुलाई सास्ति भएको छ ।

हुम्लाको खार्पुनाथ गाउँपालिका–३ स्थित राया गाउँकी ८२ वर्षीया जेष्ठ नागरिक धनसरा बुढालाई गाउँबाट सदरमुकाम सिमकोट पुर्याउनका लागि स्टेचरमा बोकेर ल्याउनु पर्यो । गत साउन २७ गते मंगलबार घरबाट सदरमुकाम सिमकोटमा रहेको जिल्ला प्रशासन कार्यालयमा पुर्याएको उहाँका छोरा सत्या बुढाले बताउनुभयो ।

बुढाका अनुसार घरबाट करीव दुई घण्टा स्टेचरमा बोकेर गाडी सञ्चालन भएको मुख्य सडक रहेको बोक्च्या गौँडामा पुगाइयो । त्यहाँबाट सोही दिन ८ हजार रुपियाँमा गाडि रिर्जव गरेर सदरमुकाम सिमकोट पगियो ।   आँखा नदेख्ने र अन्य स्वास्थ्यमा निकै समस्या भएकी आमालाई राष्ट्रिय परिचयपत्र बनाउनकै लागि सिमकोट धाउनु पर्यो । नेपाल सरकारको निति अनुसार पछिल्लो समय अनिवार्य रुपमा सामाजिक सुरक्षा भत्ता र बैंक खाता खोल्नु पर्ने भएपछि अधिकांस नागरिक राष्ट्रिय परिचयपत्र बनाउन लागि परेका छन् ।

बुढेसकाल लागेर विरामीले थला परेकी आमाको राष्ट्रिय परिचयपत्र बनाउने उदेश्यमा सिमकोट पुगेका छोरा बुढा भन्नु हुन्छ, नत राष्ट्रिय परिचयपत्र बन्यो नत आर्थिक नै रहयो । राष्ट्रिय परिचयपत्र बनाउनका लागि आठ दिन विति सक्यो तर आमाको राष्ट्रिय परिचयपत्र बनेन ।
केही समय अघि जिल्ला प्रशासन कार्यालय हुम्लाका कर्मचारीले नै फर्म भरिदिने गरेको भए पनि पछिल्लो समय कर्मचारीले उक्त फर्म नभरेका कारण राष्ट्रिय परिचयपत्र बनाउनमा अन्यौल रहेको बुढाले गुनासो गर्नुभयो ।

उक्त प्रशासन कार्यालयमा जाँदा कहिले नेटइन्टरनेको समस्या देखाएर काम नगर्नेत कहिले फर्मको समस्या देखाएर दैनिक दिन रित्तो हातमा होटेलमा फर्कनु पर्ने बाध्यता रहेको बुढाको भनाई छ । जिल्ला प्रशासन कार्यालय हुम्लामा फर्म भर्ने सुविधा नभएका कारण स्थानीय नागरिकले बजारमा रहेका आइटिहरूमा धाउनु पर्ने बाध्यता र फर्म भर्ने ठाँउनै थाहा नभए का कारणले अन्यौलमै दिन बितेको बुढाले गुनासो गर्नुभएको छ ।
तर सदरमुकाम सिमकोटको एउटा मात्रै फर्म भर्ने आइटि पसल भएकाले ७६ वर्षीय टोपे बुढाको पनि उस्तै समस्या छ । उहाँको पनि तीनदिनदेखि राष्ट्रिय परिचयपत्र बन्न नसकेको उहाँका छोरा चिन बुढाले गुनासो गर्नुभयो ।  विहानदेखि वेलुकासम्म लाइनमा लागेर पनि पालो नआएपछि वेलुका रित्तो हातमा होटेलमा फर्कनु पर्ने बाध्यता रहेको बुढाको भनाई छ । बजारमा रहेको आइटि पसलमा स्थानीय नागरिकले २ सय ५० रुपियाँ तिर्नु पर्ने बाध्यता छ ।

यदि जिल्ला प्रशासन कार्यालय हुम्लामै फर्म भर्ने व्यवस्था भएको भए हामी जस्ता गरिवहरूलाई केही राहत हुने थियो, स्थानीय बुढाले भन्नुभयो । गाउँमा अधिकांस अपङ्गता भएका व्यक्ति, जेष्ठ नागरिक लगायतले सदरमुकाम सिमकोट आएर राष्ट्रिय परिचयपत्र बनाउँदा खर्चिलो हुने गरेको छ ।  गाँउपालिका हुदै वडा स्तर सम्म राष्ट्रिय परिचयपत्र बनाउन सुरु भएको भए सबै खर्च पनि बच्चने र गाँउका नागरिकहरुले घर दैलोमा सिंहदरवार आएको महसुस गर्न पाउने स्थानियहरुको गुनासो रहेको छ ।

यस विषयमा प्रमुख जिल्ला अधिकारी नारायण पाण्डेयले आफुलाई जानकारी नभएको र आठ दिनसमम के कती कारणले बनेन त्यसका लागि आफुलाई भेटेपछि तत्काल उहाँको समस्या समधान गर्ने प्रतिक्रिया दिनुभयो ।