चंखेली गाउँपालिकामा सरकारी बाइक निजी प्रयोजनमा प्रयोग

सिमकेट ।     हुम्ला जिल्लाको दक्षिण–पूर्वी क्षेत्रस्थित चंखेली गाउँपालिकामा सरकारी बाइकहरूको चरम दुरुपयोग भइरहेको तथ्य बाहिर आएको छ । 

गाउँपालिकाका वडा नं. १ देखि ६ सम्मका वडा कार्यालयहरूले कर्मचारीहरूका लागि वितरण गरेका सरकारी मोटरसाइकलहरू व्यक्तिगत प्रयोजनका लागि प्रयोग भइरहेको स्थानीयले बताएका छन् ।  सार्वजनिक विदा, शनिबारलगायतका दिनमा समेत ती बाइकहरू जथाभावी रूपमा चलाइने, कार्यालयका कामभन्दा पनि कर्मचारीका आफन्त, छोरा, नातेदार र साथीहरूले आफ्ना निजी कामका लागि प्रयोग गर्ने गरेको स्थानीयवासीले आरोप लगाएका छन् ।

चंखेली गाउँपालिका स्थानीय दिनेश परियारका अनुसार, आफूले सरकारी सवारी साधनको दुरुपयोगबारे आवाज उठाउँदा उल्टै कुटपिट र धम्की समेत पाएको बताइएको छ । उनका अनुसार गाउँपालिका र वडा अध्यक्षका छोरा, भतिजा तथा निकट व्यक्तिहरूले गाउँपालिकाको बाइक भन्दै आफ्ना व्यक्तिगत काम, बजारका सामान किन्न र घुम्नसम्म प्रयोग गर्ने गरेका छन्।

स्थानीयहरूले भने सरकारी स्रोत र साधन जनताको सेवाका लागि प्रयोग हुनुपर्ने हो, तर अहिले त यसको उल्टो भइरहेको छ । उनीहरूले गाउँपालिका अध्यक्ष र वडा अध्यक्षहरूले यो विषयमा हालसम्म कुनै चासो नदेखाएको, न निगरानी व्यवस्था मिलाएको र नैतिक जिम्मेवारी पनि नलिएको आरोप लगाएका छन्। 

स्थानीयवासीहरूले सम्बन्धित निकाय र सरोकारवाला अधिकारीहरूलाई तत्कालै ध्यान दिन, सरकारी सम्पत्तिको दुरुपयोगमा संलग्नहरूलाई कानूनी कारबाही र चेतावनी दिन माग गरेका छन् ।