हुम्लामा उम्मेदवार उपर उजुरी कसैको परेन

सिमकोट 

निर्वाचन आयोगले प्रतिनिधिसभा सदस्य निर्वाचनका लागि उम्मेदवारी दिएका उम्मेदवारको विरोधमा बुधबार आज उजुरी दिन सकिने व्यवस्था गरेका थियो  । तर हुम्लामा कसैको पनि दाबी बिरोध उजुरी नपरेको जिल्ला मुख्य निर्वाचन अधिकृत निलकण्ठ बरालले जानकारी दिनुभएको छ । आयोगले तय गरेको समयसीमा अनुसार पहिलो हुने निर्वाचित हुने निर्वाचन प्रणालीतर्फको निर्वाचन कार्यक्रम अनुसार मनोनयन पत्र दर्ता भएका उम्मेदवारको विरोधमा उजुरी दिन सकिने जनाएको हो ।

हिजो ८ वटा दलले मनोनयन दर्ता गरेपनि त्यसका विरुद्ध कसैको पनि दाबी बिरोध उजुरी नपरेको मुख्य निर्वाचन अधिकृत बरालले बताउनु भएको छ । उक्त उजुरीपछि यहि माघ ८ गते साँझ ५ बजेसम्म मनोनयन पत्र र उजुरी उपर जाँचबुझ एवम् आवश्यक निर्णय गरी अन्तिम नामावली प्रकाशन गरिने भएको छ ।आयोगले माघ ९ गते बिहान १० बजेदेखि दिउँसो १ बजेसम्म उम्मेदवारको नाम फिर्ता लिन सक्ने व्यवस्था गरेको जनाएको छ । सोही दिन दिउँसो १ बजेदेखि ३ बजेसम्ममा उम्मेदवारको अन्तिम नामावली प्रकाशन गरी दिउँसो ४ बजेदेखि साँझ ७ बजेसम्ममा उम्मेदवारलाई निर्वाचन चिन्ह प्रदान गरिने भएको बरालले बताउनुभयो ।

प्रतिनिधिसभा सदस्य निर्वाचनको पहिलो हुने निर्वाचित हुने निर्वाचन प्रणालीतर्फ उम्मेदवारको मनोनयन पत्र दर्ता कार्यक्रम सम्बन्धित मुख्य निर्वाचन अधिकृत र निर्वाचन अधिकृतको कार्यालयमा मंगलबार उत्साहजनक तथा शान्तिपूर्ण रूपमा सम्पन्न भएको हो ।