हुम्लामा सर्वदलीय बैठक सम्पन्न, समसामयिक विषयमा साझा धारणा र सहकार्यको प्रतिबद्धता

हुम्ला । 
नेपाली कम्युनिष्ट पार्टी हुम्लाको पहलमा जिल्लास्थित विभिन्न राजनीतिक दलहरूको सर्वदलीय बैठक सम्पन्न भएको छ। बैठकमा वर्तमान राष्ट्रिय राजनीतिक परिस्थिति, जनजीवनमा देखिएका उतारचढाव तथा समसामयिक सार्वजनिक सरोकारका विषयमा गम्भीर छलफल गरिएको हो ।

बैठकमा सहभागी राजनीतिक दलका प्रतिनिधिहरूले राष्ट्रिय हित, सुशासन, स्थानीय सरकारको प्रभावकारिता, लोकतान्त्रिक मूल्य–मान्यताको संरक्षण तथा जनउत्तरदायी शासन व्यवस्थालाई सुदृढ बनाउन सबै पक्षबीच सहकार्य आवश्यक रहेकोमा जोड दिएका छन्। साथै प्राकृतिक विपद् व्यवस्थापनमा पूर्वतयारी, जोखिम न्यूनीकरण तथा विपद्का समयमा प्रभावकारी समन्वय गरी नागरिकको सुरक्षा सुनिश्चित गर्नुपर्ने विषयमा पनि साझा धारणा व्यक्त गरिएको थियो  ।

त्यसैगरी, जनजीविकासँग प्रत्यक्ष सम्बन्धित शिक्षा, स्वास्थ्य, कृषि, रोजगारी, विकास निर्माण तथा आधारभूत सेवा प्रवाहलाई थप प्रभावकारी बनाउन सम्बन्धित निकायसँग समन्वय र आवश्यक पहल गर्ने प्रतिबद्धता बैठकले जनाएको छ। सहभागीहरूले राजनीतिक दलहरूबीच आपसी समझदारी, सहकार्य र संवादलाई निरन्तरता दिँदै जिल्लाको समग्र विकास र नागरिकका साझा हितका विषयमा एकताबद्ध भएर अघि बढ्नुपर्नेमा जोड दिएका  छन ।

नेपाली कम्युनिष्ट पार्टी हुम्लाका इन्चार्ज हस्तबहादुर शाहीका अनुसार बैठकले जिल्लाका समसामयिक समस्या समाधानका लागि साझा पहल गर्ने, जनचासोका विषयमा संयुक्त रूपमा आवाज उठाउने तथा लोकतान्त्रिक अभ्यासलाई थप सुदृढ बनाउँदै जनताको हितलाई केन्द्रमा राखेर अगाडि बढ्ने प्रतिबद्धता व्यक्त गरेको छ। बैठकले जिल्लाको समग्र विकास, सुशासनको प्रवद्र्धन र नागरिकको जीवनस्तर सुधारका लागि राजनीतिक दलहरूबीच सहकार्य र समन्वयलाई थप मजबुत बनाउने निष्कर्षसमेत निकालेको इन्चार्ज शाहीले बताउनुभयो ।