सिमकोट ७ धारापोरीमा फोरजी सेवा पूर्ण रूपमा सञ्चालन, स्थानीय खुसी

सिमकोट

सिमकोट गाउँपालिका–७  धारापोरीमा रहेको नेपाल टेलिकमको रिपिटर टावरमार्फत फोरजी सेवा पूर्ण रूपमा सञ्चालनमा आएको छ । लामो समयदेखि फोरजी सेवा जडान गरिए पनि प्रभावकारी रूपमा सञ्चालन हुन नसक्दा स्थानीय सेवाग्राही समस्यामा पर्दै आएका थिए। नेपाल टेलिकम हुम्लाका अनुसार रिपिटर टावरमा आरआईयू मेसिन जडान गरिएको आठ दिनपछि प्राविधिक समस्या समाधान गरी शुक्रबारदेखि सेवा पूर्ण रूपमा सञ्चालनमा ल्याइएको हो । मेसिनको सेटिङमा देखिएको समस्या समाधान गर्न काठमाडौंबाट आवश्यक प्राविधिक सहयोग प्रदान गरिएको थियो ।

नेपाल टेलिकमका प्राविधिक ओवजन शाही र राम बहादुर बोहराले शुक्रबार आवश्यक प्राविधिक कार्य सम्पन्न गरेपछि धारापोरी क्षेत्रमा फोरजी सेवा नियमित रूपमा सञ्चालनमा आएको छ । 

धारापोरीमा रहेको रिपिटर टावर स्थापना भएको करिब ७–८ वर्ष भए पनि फोरजी सेवा प्रभावकारी रूपमा सञ्चालन हुन सकेको थिएन । यसअघि कसैको मोबाइलमा फोरजी चल्ने र कसैकोमा नचल्ने समस्या रहेको स्थानीयहरूले बताएका छन ।

फोरजी सेवा पूर्ण रूपमा सञ्चालनमा आएपछि स्थानीयवासी निकै उत्साहित भएका छन् । स्थानीय विनोद विकका अनुसार अब सबै मोबाइलमा फोरजी सेवा सहज रूपमा चल्न थालेको छ । सेवा सञ्चालन भएपछि विद्यालय, स्वास्थ्य चौकी तथा अन्य सरकारी तथा गैरसरकारी कार्यालयका दैनिक कामकाजमा सहजता आएको छ ।

त्यसैगरी स्थानीयहरूले अनलाइन माध्यमबाट एकआपसमा सहज रूपमा सम्पर्क र संवाद गर्न पाएको बताइएको छ । दुर्गम क्षेत्र धारापोरीमा गुणस्तरीय दूरसञ्चार सेवा विस्तार भएसँगै सूचना तथा सञ्चार प्रविधिमा स्थानीयको पहुँच थप मजबुत हुने अपेक्षा गरिएको छ ।