सर्केगाडमा पालिका स्तरीय बाल कचहरी सम्पन्न, बालबालिका क्षेत्रलाई प्राथमिकता दिने उपाध्यक्ष तिमिल्सिनाको प्रतिबद्धता

हुम्ला ।
हुम्लाको सर्केगाड गाउँपालिकामा पालिका स्तरीय बाल कचहरी कार्यक्रम सम्पन्न भएको छ । बाल विवाह र बाल श्रम न्यूनीकरणका लागि एकीकृत पहल स्वरुप रेडियो कर्णाली आवाज हुम्लाको आयोजनामा कार्यक्रम गरिएको हो । सर्केगाड गाउँपालिकाको सभा हलमा आयोजना गरिएको कार्यक्रममा गाउँपालिकाका उपाध्यक्ष देवकी तिमिल्सिनाले आगामी आर्थिक वर्षको बजेटमा बालबालिका क्षेत्रलाई प्राथमिकतामा राखिएको बताउनुभयो ।

कार्यक्रममा पालिका भरका बालबालिका, अभिभावक, शिक्षक, विद्यालय व्यवस्थापन समितिका पदाधिकारी लगायत ८२ जना सहभागी रहेका थिए । सहभागीलाई सम्बोधन गर्दै उपाध्यक्ष तिमिल्सिनाले बालबालिकाको अधिकार, शिक्षा र संरक्षणका क्षेत्रमा पालिकाले थप काम गर्ने प्रतिबद्धता व्यक्त गर्नुभयो ।

उहाँले आगामी दिनमा प्रत्येक विद्यालयमा बाल क्लब सञ्चालनका लागि गाउँपालिकाले निश्चित बजेटको व्यवस्था गर्ने बताउँदै विद्यालयमा किशोरीहरूका लागि प्याड निर्माण कार्यक्रम समेत सञ्चालन गर्ने उल्लेख गर्नुभयो । बाल विवाह, बाल श्रमजस्ता समस्या न्यूनीकरणका लागि स्थानीय तह, विद्यालय, अभिभावक र बालबालिका बीच सहकार्य आवश्यक रहेको सहभागीहरूले बताएका थिए ।

कार्यक्रमले बालबालिकाको सवालमा छलफल र सुझाव संकलन गर्ने अवसर प्रदान गरेको आयोजकले जनाएको छ । गुडनेवर्स इन्टरनेसनल नेपाल र किर्डाक नेपालको आर्थिक सहयोगमा रेडियो कर्णली आवाजको आयोजनामा आज सर्केगाडमा बाल कचहरी गरिएको हो ।