नाम्खा–४ मा जेठासी बाली भित्राउने चटारो, उवा उत्पादनमा वृद्धि ।।

नाम्खा, हुम्ला ।
हुम्लाको नाम्खा गाउँपालिका–४ याल्वाङका किसानहरूले जेठासी बाली भित्राउन सुरु गरेका छन् । कार्तिक महिनामा छरेको उवा र गहुँ असार महिनामा पाकेसँगै किसानहरू अहिले बाली भित्र्याउने काममा व्यस्त देखिएका छन ।

स्थानीय किसान मुन्डुप लामाका अनुसार यस वर्ष उवाको उत्पादन गत वर्षको तुलनामा उल्लेख्य रूपमा राम्रो भएको बताउनु भयो । उहाँले यस वर्ष आफ्नो खेतबाट करिब ६ क्विन्टल उवा उत्पादन भएको जानकारी दिनुभयो । अनुकूल मौसम, समयमै गरिएको खेती र राम्रो उत्पादनका कारण किसानहरू उत्साहित बनेका छन ।

लामाले उवा टिपिसकेपछि सोही खेतमा मिठे फापर छर्ने तयारी भइरहेको बताउनुभयो । नाम्खा क्षेत्रमा वर्षभरि उपलब्ध समयको सदुपयोग गर्दै एकपछि अर्को बाली लगाउने परम्परा रहेको छ । उवा भित्राएपछि फापर खेती गर्ने चलनले किसानलाई थप उत्पादन र आम्दानीमा सहयोग पुग्ने विश्वास गरिएको छ ।

यसैबीच, गहुँ बाली पनि पूर्ण रूपमा पाकिसकेको छ । किसानहरू अहिले गहुँ काट्ने, सुकाउने र घर भित्र्याउने काममा जुटेका छन । मौसम अनुकूल रहेकाले बाली भित्र्याउन सहज भएको स्थानीय किसान लामाको भनाइ छ ।
कृषि नै मुख्य पेशा रहेको नाम्खा गाउँपालिकाका अधिकांश परिवारका लागि उवा, गहुँ र फापर प्रमुख खाद्यान्न बाली हुन् । यस वर्ष उवाको उत्पादन राम्रो भएकाले खाद्य सुरक्षामा समेत सकारात्मक प्रभाव पर्ने अपेक्षा गरिएको छ ।