पोषण प्रवद्र्धन तथा विषादी न्यूनीकरण अभियान सम्बन्धी समन्वयात्मक बैठक तथा अभिमुखीकरण कार्यक्रम सम्पन्न

हुम्ला । 
जिल्ला स्वास्थ्य सेवा कार्यालय हुम्लाको आयोजनामा पोषण प्रवद्र्धन तथा विषादी न्यूनीकरण अभियान सञ्चालन सम्बन्धी समन्वयात्मक बैठक तथा अभिमुखीकरण कार्यक्रम सम्पन्न भएको छ । जिल्ला स्वास्थ्य सेवा कार्यालयका प्रमुख डा. उमाकान्त तिवारीको अध्यक्षतामा सम्पन्न कार्यक्रममा अभियानलाई प्रभावकारी रूपमा सञ्चालन गर्न आवश्यक समन्वय, सहकार्य तथा सरोकारवाला निकायहरूको भूमिकाबारे छलफल गरिएको थियो । 

कार्यक्रममा पोषण सुधार, सुरक्षित तथा स्वस्थ खाद्य उपभोग, कृषि उत्पादनमा विषादीको न्यूनीकरण तथा त्यसबाट मानव स्वास्थ्यमा पर्ने असरका विषयमा अभिमुखीकरण गरिएको थियो। साथै पोषणयुक्त खानपानको प्रवद्र्धन, स्थानीय उत्पादनको उपयोग र जनचेतना अभिवृद्धिका लागि सबै पक्षको सक्रिय सहभागिता आवश्यक रहेकोमा जोड दिइएको थियो । 

अभिमुखीकरणका क्रममा अत्यधिक विषादी प्रयोगले मानव स्वास्थ्यमा दीर्घकालीन नकारात्मक प्रभाव पार्न सक्ने भएकाले यसको प्रयोगलाई न्यूनीकरण गर्दै सुरक्षित कृषि प्रणाली अपनाउनुपर्ने विषयमा सहभागीहरूलाई जानकारी गराइएको थियो । अभियानलाई जिल्लाभर प्रभावकारी रूपमा सञ्चालन गर्न स्वास्थ्य क्षेत्र, सुरक्षा निकाय, सञ्चार क्षेत्र तथा सम्बन्धित सरोकारवाला संस्थाबीच आपसी समन्वय र सहकार्यलाई थप मजबुत बनाउने प्रतिबद्धता समेत व्यक्त गरिएको थियो । कार्यक्रममा स्वास्थ्यकर्मी, सुरक्षाकर्मी, विभिन्न सरोकारवाला निकायका प्रतिनिधि तथा सञ्चारकर्मीहरूको सहभागिता रहेको थियो ।