लाली गुराँस माध्यमिक विद्यालयमा ३० लाखको खेल मैदान र १५ लाखको घेरबार निर्माण

हुम्ला ।

सर्केगाड गाउँपालिका वडा नम्बर २ लिप्ने स्थित लाली गुराँस माध्यमिक विद्यालयमा करिब ३० लाख रुपैयाँको लागतमा आधुनिक खेल मैदान निर्माण गरिएको छ ।  विद्यालयमा खेलकुदका गतिविधिलाई प्रभावकारी बनाउने उद्देश्यले निर्माण गरिएको खेल मैदानबाट विद्यार्थीहरूलाई नियमित अभ्यास र विभिन्न प्रतियोगितामा सहभागिता जनाउन सहज हुने विश्वास गरिएको छ ।

विद्यालयका प्रधानाध्यापक काली बहादुर महताराका अनुसार “राष्ट्रका लागि खेलकुद, स्वास्थ्यका लागि खेलकुद” भन्ने उद्देश्यलाई आत्मसात गर्दै विद्यालयमा खेल मैदान निर्माण गरिएको बताउनु भयो । यसअघि विद्यालय परिसरमा रहेको साँघुरो खेल मैदानका कारण विद्यार्थीहरूले सहज रूपमा खेल गतिविधि सञ्चालन गर्न कठिनाइ भोग्दै आएका थिए । सीमित स्थानका कारण विद्यालयस्तरीय तथा अन्तरविद्यालय खेलकुद प्रतियोगिता सञ्चालन गर्नसमेत समस्या हुने गरेको प्रह महताराले बताउनु भयो ।  

प्रधानाध्यापक महताराका अनुसार कर्णाली प्रदेशका पूर्वमुख्यमन्त्री तथा कर्णाली प्रदेश कांग्रेस संसदीय दलका नेता जीवनबहादुर शाहीको पहलमा ३० लाख रुपैयाँ बराबरको बजेटबाट खेल मैदान निर्माण गरिएको होे ।  नयाँ खेल मैदान निर्माण भएसँगै विद्यालयमा फुटबल, भलिबल, एथलेटिक्स लगायतका विभिन्न खेल गतिविधि सहज रूपमा सञ्चालन गर्न सकिने भएको छ ।

विद्यालय परिवारले खेल मैदानको उपलब्धताले विद्यार्थीहरूको शारीरिक तथा मानसिक विकासमा सकारात्मक प्रभाव पार्नुका साथै खेलकुद क्षेत्रमा नयाँ प्रतिभा उत्पादन गर्न महत्वपूर्ण योगदान पुग्ने अपेक्षा गरेको छ । नियमित खेल अभ्यासले विद्यार्थीमा अनुशासन, नेतृत्व क्षमता, आत्मविश्वास र समूहमा काम गर्ने संस्कारको विकास हुने विश्वास विद्यालयले लिएको छ ।

त्यसैगरी, हुम्ला जिल्ला प्रदेशसभा निर्वाचन क्षेत्र ‘क’ का प्रदेशसभा सदस्य जुम्कित लामा कार्कीको पहलमा विद्यालयमा १५ लाख रुपैयाँको लागतमा घेरबार निर्माण गरिएको छ । घेरबार निर्माणसँगै विद्यालय परिसर थप सुरक्षित बनेको विद्यालय प्रशासनले जनाएको छ ।

निर्माण गरिएको घेरबारले विद्यालयका शैक्षिक भवन, खानेपानी धारा, शौचालय, खेल मैदान, वृक्षारोपण गरिएका बोटबिरुवा तथा अन्य चल–अचल सम्पत्तिको संरक्षणमा महत्वपूर्ण भूमिका खेल्ने अपेक्षा गरिएको छ । यसअघि खुला परिसर भएका कारण चौपाया प्रवेश गर्ने, संरचनामा क्षति पुग्ने तथा विद्यालयको सम्पत्ति संरक्षणमा चुनौती रहेको विद्यालयले जनाएको छ ।

विद्यालय व्यवस्थापन समिति, शिक्षक, अभिभावक तथा स्थानीयवासीले खेल मैदान र घेरबार निर्माणलाई विद्यालयको पूर्वाधार विकासका दृष्टिले महत्वपूर्ण उपलब्धिका रूपमा लिएका छन् । उनीहरूले आगामी दिनमा पनि विद्यालयको शैक्षिक गुणस्तर अभिवृद्धिसँगै भौतिक पूर्वाधार विकासमा सबै पक्षको सहयोग आवश्यक रहेको बताएका छन् ।
स्थानीय सरोकारवालाहरूका अनुसार खेल मैदान र सुरक्षित विद्यालय परिसरले विद्यार्थीहरूलाई अध्ययनसँगै अतिरिक्त क्रियाकलापमा सक्रिय बनाउने वातावरण सिर्जना गर्नेछ ।  यसबाट विद्यालयको समग्र शैक्षिक वातावरण थप सुधार हुनुका साथै ग्रामीण क्षेत्रका विद्यार्थीहरूले पनि गुणस्तरीय खेलकुद पूर्वाधारको सुविधा पाउने अपेक्षा गरिएको प्रअ महताराको भनाई रहेको छ । 
विद्यालय प्रशासनले निर्माण सम्पन्न भएका दुवै पूर्वाधारको संरक्षण र दीगो व्यवस्थापनमा सबै सरोकारवालाको सहयोग आवश्यक रहेको जनाएको छ । विद्यालयले आगामी दिनमा थप शैक्षिक तथा भौतिक पूर्वाधार विस्तार गर्दै विद्यार्थीमैत्री वातावरण निर्माण गर्ने लक्ष्य लिएको जनाएको छ ।