कालाशिल्ता आधारभूत विद्यालयको चारकोठे पक्की भवन उद्घाटन

सिमकोट ।    हुम्लाको सिमकोट गाउँपालिका–६ मा रहेको कालाशिल्ता आधारभूत विद्यालयको चारकोठे पक्की भवन उद्घाटन गरिएको छ । नवनिर्मित भवनको उद्घाटन सिमकोट गाउँपालिकाका अध्यक्ष विजय भण्डारीले गर्नुभएको हो ।  विद्यालयको शैक्षिक वातावरणलाई थप व्यवस्थित र प्रभावकारी बनाउने उद्देश्यले निर्माण गरिएको उक्त भवनमा चारवटा कक्षा कोठा रहेका छन् । विद्यालय स्रोतका अनुसार भवन निर्माणमा कुल १ करोड १० लाख रुपैयाँ लागत लागेको छ । दुई वर्षको अवधिमा निर्माण सम्पन्न भएको भवनका लागि अघिल्लो आर्थिक वर्षमा सिमकोट गाउँपालिका–६ को सम्पूर्ण बजेटबाट ६५ लाख रुपैयाँ र चालु आर्थिक वर्षमा सिमकोट गाउँपालिकाले ४५ लाख रुपैयाँ बजेट विनियोजन गरेको थियो । सोही बजेटबाट भवन निर्माण सम्पन्न गरिएको विद्यालयले जनाएको छ ।

नवनिर्मित पक्की भवन सञ्चालनमा आएसँगै विद्यार्थीलाई अध्ययन–अध्यापनका लागि थप सहज र सुरक्षित वातावरण सिर्जना हुने अपेक्षा गरिएको छ । लामो समयदेखि भौतिक पूर्वाधारको अभाव झेल्दै आएको विद्यालयका लागि चारकोठे भवन निर्माण हुनु महत्वपूर्ण उपलब्धिका रूपमा लिइएको छ । हाल कालाशिल्ता आधारभूत विद्यालयमा १ सय ३३ जना विद्यार्थी अध्ययनरत रहेका छन । विद्यार्थीको संख्या बढ्दै गएको अवस्थामा नयाँ भवनले कक्षा सञ्चालनमा सहजता ल्याउने विद्यालयको अपेक्षा छ ।

भवन उद्घाटन कार्यक्रममा विद्यालय व्यवस्थापन समिति, शिक्षक, विद्यार्थी, अभिभावक तथा स्थानीयवासीको सहभागिता रहेको थियो । सहभागीहरूले विद्यालयको भौतिक पूर्वाधारसँगै शिक्षाको गुणस्तर सुधारमा पनि ध्यान दिनुपर्नेमा जोड दिएका छन् । नवनिर्मित भवनले विद्यार्थीको सिकाइ वातावरण सुधार गर्नुका साथै विद्यालयको शैक्षिक गतिविधिलाई थप प्रभावकारी बनाउन सहयोग पुग्ने विश्वास विद्यालयले लिएकोे छ । साथै उक्त विद्यालयको २७ औ वार्षिकोत्सव तथा अभिभावक भेला सम्पन्न भएको छ । विद्यालयका प्रधानाध्यापक गणेश बहादुर शाहीले आर्थिक वर्ष २०८२÷८३ को कुल आय–व्यय विवरण प्रस्तुत गर्दै विद्यालयको जम्मा रकम १ करोड ३० लाख ६२ हजार ६ सय १० रुपैयाँ रहेको जानकारी दिनुभयो । त्यसमध्ये १ करोड १८ लाख ६७ हजार ७ सय १० रुपैयाँ खर्च भएको र ११ लाख ९५ हजार रुपैयाँ बैंक मौज्दात रहेको उहाँले बताउनुभयो ।