कर्णाली नदीमा बेपक्ता भएका बालबालिकाको स्थानिय परम्परा अनुसार दाहसंस्कार

सिमकोट ।   बिहीबार खार्पुनाथ गाउँपालिकाको वडा नम्बर १ सुनाखाडामा कर्णाली नदीमा बेपक्ता भएका बृषबहादुर शाहीकी करिब ११ वर्षीया छोरी अनु शाही र रामचन्द्र रावलका करिब १२ वर्षीय छोरा प्रशान्त रावलको स्थानिय परम्परा अनुसार आज दाहसंस्कार गरिएको छ । कर्णाली नदीको तिव्र बहावका कारण बालबालिकाको केही पत्तो नलाग्दा जिउदो भेटाउने आस मरेपछि बालबालिकाका आफन्तले बालबालकिाले लगाएका कपडाको पुत्ला बनाई आज स्थानिय परम्परा अनुसार दाहसंस्कार गरिएको वडा अध्यक्ष जय बहादुर शाहीले बताउनु भयो ।

आज जिल्ला प्रहरी कार्यालयका प्रहरी निरिक्षकको युवराज ढकालको टोली, याङचु प्रहरी चौकीको टोली र गाउँका स्थानियले सर्केगाड गाउँपालिका वडा नम्बर २ मा रहेको रिपगाड खोला सम्म बेपक्ता बालबालिकाको खोज तलास गर्दा पनि नभेटीएका कारण दाहसंस्कार गरिएको आफन्तले बताएका छन । बर्षाको सिजन भएकोले कर्णाली नदीको तिव्र बहावका कारण खोज तलास गर्न निकै नै सकस भएको वडा अध्यक्ष शाहीले बताउनु भयो । बिहीबार बिहान करिब ११ बजेतिर खाना खाइसकेपछि नदी किनारमा खेल्न गएका खार्पुनाथ–१ तल्ला लालीका दुई बालबालिकालाई कर्णाली नदीको बहावले बगाएपछि बेपत्ता भएका थिए । बेपत्ता हुने दुवै जना मालिका माध्यमिक विद्यालय कक्षा ७ मा अध्ययनरत थिए ।