कालिकोटका शिक्षक आन्दोलित

कालिकोट : कालिकोट जिल्लाका सबै तहका सामुदायिक विद्यालयमा कार्यरत अस्थायी कर्मचारी आन्दोलित भएका छन्। आन्दोलनमा नेपाल शिक्षक महासंघ कालिकोटले पनि एक्यबद्धता जनाएको छ।

सरकारले श्रेणीबिहीन कर्मचारीले पाउने सेवा सुविधासमेत सामुदायिक विद्यालयमा कार्यरत कार्यालय सहायक र कार्यालय सहयोगी कर्मचारीलाई नदिएको भन्दै सुरु गरेको आन्दोलनमा शिक्षक महासंघले पनि एक्यबद्धता जनाएको हो।

कालिकोटका सबै विद्यालयमा कार्यरत शिक्षक आन्दोलित भएका छन्। उनीहरुले विद्यालय कर्मचारीले विभिन्न माग राखेर आन्दोलन गरिरहँदा सरकारले कुनै चासो नदिँदा आफूहरु आन्दोलित हुनु परेको शिक्षकले जनाएका छन्। 

जिल्लाका सबै सामुदायिक विद्यालयमा बिहीबार नेपाल शिक्षक महासंघ कालिकोटको निर्देशनमा विद्यालयको प्रवेशद्धारमा बत्ती बालेर घाँटीमा कालो कपडाको माला लगाई प्रदर्शन गरेका छन्। 

नेपाल विद्यालय कर्मचारी परिषद कालिकोटका अध्यक्ष ललित शाहीले सामुदायीक विद्यालयमा कार्यरत कर्मचारी न्यून सेवा सुविधामा काम गर्नुपर्ने, सरकारले सामुदायिक विद्यालयमा कर्मचारीको दरबन्दी नदिँदा व्यवस्थापनमा आएको खर्चबाट तलब खानुपर्ने, लामो समयदेखि काम गरेका कर्मचारीको सेवा सुविधाको ग्यारेन्टी नभएको, नेपाल सरकारको कर्मचारी र शिक्षकले सेवा निवृतपछि पेनसन, उपदान, उपचार खर्च र संचित बिदाको रकम पाउने तर विद्यालयमा कार्यरत कर्मचारीले अवकाश पछि कुनै सुविधा नपाउने र खाली हात घर जानुपर्ने समस्या रहेकाले आफूहरु आन्दोलित भएको बताए।