विप्लव नेता पक्राउ गर्न असफल भएपछि पत्रकारको घर खानतलासी

विप्लव नेतृत्व नेपाल कम्युनिष्ट पार्टीका हुम्ला नेता भागेपछि नियन्त्रण गर्न असफल भएको प्रहरीले पत्रकारहरुको घर खानतलासी गरेको छ ।  विप्लवका जिल्ला सेक्रेटरी कुम्भ बुढा भागेको पत्रकारद्वय नरजंग तामाङ र कर्णबहादुर रोकायको घरमा प्रहरीले खानतलासी गरेको हो ।

तामाङ नेपाल टेलिभिजन, नयाँ पत्रिका दैनिकका हुम्ला सम्वददाता हुन भने रोकाया नेपाल पत्रकार महासंघका पूर्व अध्यक्ष र कचहरी दैकिकका सम्पादक हुन् ।

रोकायको सिमकोटा गाउँपालिका–५ मा रहेको घर र तामाङको डेरामा गएराती प्रहरीले पत्रकारद्वयको घर र डेरामा पुगेर खानतलासी गरेको छ ।

हुम्ला जिल्ला अदालतका न्यायाधीस जगतबहादुर पौडेलको एकल इजलासले मंगलबार विप्लव कार्यकर्ता आरोप लागेका बुढालाई राज्य विरुद्धको अपराध नभएको भन्दै सफाई दिएका थिए ।

बुढालाई मानव अधिकारकर्मीहरुको रोहवरमा अदालतले छाडेको हो । बुढालाई अदालतले सफाई दिएपछि गेट बाहिर पठाए लगतै पुनः पक्राउ गर्ने योजना प्रहरीको थियो । प्रहरीले पक्राउ गर्न नपाउँदै बुढा भागेपछि पत्रकारले लुकाएको आरोपमा मध्यराती प्रहरीले तामाङ र रोकायाको घरमा खानतलासी गरेको हो ।

बुढालाई खोज्ने क्रममा एक दर्जन प्रहरी घरमा बसेर बत्ती बन्द गर्दै मानसिक तनाव दिएर खानतलासी गरेकोमा रोकायले आपत्ती जनाएका छन् ।

द्वयपत्रकारसहित रेडियो कर्णाली, रेडियो कैलाश, लगायतका सञ्चार मिडियालाई प्रहरीले निगरानी गरेको पत्रकार महासंघ हुम्लाका अध्यक्ष अर्जुन बोहराले बताए ।

अध्यक्ष बोहराले अनावश्यक पत्रकारहरुलाई धम्की दिएर प्रहरीले गरेको व्यवहारप्रति आपत्ती जनाए । प्रहरीले पत्रकारहरुलाई निगरानी गर्नुको कारणबारे बुझ्न खोज्दा प्रमुख जिल्ला अधिकारी चिरञ्जिवि गिरीले आफुलाई जानकारी नभएको बताए । बुढालाइ प्रहरीले गत असोज २३ गते ताजाकोट गाउँपालिका ५ बाट पक्राउ गरेर सिमकोट ल्याएको हो ।