कोरोना संक्रमितको हुम्लाबाट हेलिकप्टर मार्फत काठमाण्डौ उद्धार

हुम्लाको सिटिजन बैंक शाखा कार्यालय सिमकोटमा र्कायरत एक जना कोरोना संक्रमितको आज हेलिकप्टर मार्फत उद्धार गरीएको छ । बैंकमा कार्यरत पाँचजना कर्मचारीलाई एन्टिजेन विधिबाट कोरोना परिक्षण गर्दा दुई जना कर्मचारीमा कोरोना संक्रमण देखिएपछि एकजना संक्रमितको अवस्था जटिल देखिएपछि जिल्ला बाहिर हेलिकप्टर मार्फत उद्धार गरीएको जिल्ला अस्पताल हुम्लाका ल्याप टेक्निसियन बलिराज भण्डारीले जानकारी दिनुभयो ।

कोरोना संक्रमण देखिएका २५ वर्षीय पुरूषको हेलिकोप्टरबाट उद्वार गरेर काठमाण्डौ लगिएको भण्डारीले जानकारी दिनुभयो । काठमाण्डौमा रहेको स्टार अस्पतालबाट दुईजना डाक्टर सहितको टोली हुम्ला पुगेर संक्रमित पुरुषको उद्धार गरीएको हो ।

कोरोना संक्रमितको स्वासप्रश्वासमा समस्या भएपछि जिल्ला अस्पताल हुम्लाले काठमाण्डौ रेफर गर्नुका साथै हुम्लाबाट हेलिकोप्टरमा काठमाडौं लगिएको स्वास्थ्य सेवा कार्यलय हुम्लाका निमित्त कार्यलय प्रमुख सरिता बोहराले जानकारी दिनुभयो ।

कर्मचारीमा कोरोना संक्रमण देखिएपछि दुई दिन सिटिजन्स बैंक शाखा कार्यालय सिमकोट सिल गर्नुका साथै कारोबार ठप्प भएको बैंकले जानकारी दिएको छ ।

अर्का कोरोना संक्रमित महिलाको अवस्था सामान्य रहेकाले जिल्लामै स्वास्थ्यकर्मीको निगरानीमा रहेको बताइएको छ ।