बनगाड खोलाको बाढीले माइक्रो बस बगायोः हाम फालेर यात्रु बाँच्न सफल

८ भदौ, सल्यान । छिन्चु जाजरकोट सडकखण्ड अन्तर्गत सल्यानको बनगाड खोलाको बाढीले माइक्रो बस बगाएर लिदा समेत यात्रुले आप्mनो ज्यान जोगाउन सफल भएका छन् ।
माइक्रो बसले खोला पार गर्दागर्दै बाढीले गाडी बगाउन थालेपछि सवार यात्रुहरुले हाम फालेर ज्यान जोगाएका हुन् ।
जाजरकोटबाट नेपालगञ्जका लागि छुटेको हाइस बिहीबार बाढीमा बगेको हो । यात्रुहरुले हाम फालेर ज्यान जोगाए पनि उनीहरुले साथमा बोकेका झोला लगायतका सामान भने खोलामा बगेका छन् । ढुंगामा अड्किएको गाडीलाई डोजरको सहायताले निकालिएको छ ।

उक्त खोलामा निर्माणाधीन पक्की पुल यसअघि नै खोलाले बगाइसकेको छ । सम्बन्धित निकायबाट समयमै पुल निर्माणको काम नसक्दा बाढीले बगाएको स्थानीय जानकार बताउँछन् । लामा कन्सट्रक्स कम्पनीले उक्त पुल निर्माणको जिम्मा पाएको छ ।

पुल नभएपछि वर्षायाममा आवतजावत गर्न समस्या परेको छ । कतिपयले पैदलयात्रु र गाडीहरुले जोखिम मोलेरै बाढी तर्ने गर्दछन ।

खोलामा आएको बाढी नघट्दासम्म गाडीहरु रोकिनुपर्दा यात्रुहरु बाटोमै अलपत्र पर्दछन् ।

छिन्चु(जाजरकोट सडकखण्डमा पर्ने बनगाड खोला तरेर सल्यान, सुर्खेत, जाजरकोट, डोल्पा, रुकुम लगायतका जिल्लामा दैनिक हजारौं व्यक्तिहरु आवतजावत गर्दछन् ।