मुलुकको समृद्धीबाहेक अरुकुनै स्वार्थ छैन: प्रधानमन्त्री ओली (भिडियो)

झापा – प्रधानमन्त्री केपी शर्मा ओलीले आफू राजनीतिक जोगी भएको बताएका छन्। गृह जिल्ला झापाको गौरादह नगरपालिकाले आयोजना गरेको नागरिक अभिनन्दन कार्यक्रममा उनले आफूलाई कमाउने कुनै मनसाय नरहेको बताए।

उनले भने, ‘मलाई कमाउनु छैन। मौका पाएको छु काम गरेर देखाउँछु। जोगीलाई कमाउने धन्दा हुँदैन। म पनि राजनीतिक जोगी हुँ।’

आफ्नो नेतृत्वको सरकार विकासको भिजन बोकेको सरकार भएको उनले दाबी गरे। उनले भने, ‘नेपाललाई समृद्ध बनाउने अभियानमा म लागिपरेको छु। मैले ढाँट छलको राजनीति गर्नु परेको छैन, गर्दिन।’

प्रधानमन्त्री ओलीले आफ्नो पार्टीबाट काम गर्नका लागि भरपूर सहयोग रहेको बताए। फरक प्रसंगमा ओलीले आधुनिक कृषि प्रणालीमा जोड दिदै अब बाँझा खेत जोतिनुपर्ने र आधुनिक कृषि प्रणाली अवलम्बन गरिनुपर्ने बताए ।

देश बिकास र समृद्धिका लागि फरक योजना बनाएर अघि बढ्ने प्रधानमन्त्री आफ्नै क्षेत्रबाट पाएको भन्दै नगरपालिकाले प्रधानमन्त्री ओलीलाई नागरिक अभिनन्दन गरेको हो ।