खार्पुनाथ गाउँपालिकाले थाल्यो भिडियो एक्सरेका साथै रगत परीक्षण

   हुम्ला । हुम्लाको खार्पुनाथ गाउँपालिका स्वास्थ्य शाखाले सुरक्षित मातृत्वका लागि गर्भवती महिलाहरुका लागि आजबाट निशुल्क भिडियो एक्सरे सेवा सञ्चालन गरेको छ । गर्भवती महिलाका लागि भिडियो एक्सरे सेवा आजबाट सुरु भएको गाउँपालिका स्वास्थ्य शाखा प्रमुख बलिराज शाहीले बताउनुभयो । आज पहिलो दिन वडा नम्बर ४ छिप्रा स्वास्थ्यचौकीबाट यो सेवा प्रदान गरिएको बताउनुभयो । उक्त स्वास्थ्यचौकीबाट १७ जना गर्भवती महिलाको भिडियो एक्सरेमार्फत गर्भजाँच गरिएको हो । 
गर्भवती तथा गर्भमा रहेका शिशुको स्वास्थ्य अवस्थाको जाँच गर्न जिल्ला अस्पताल सिमकोटमा धाउनुपर्ने बाध्यताको अन्त्य गर्न गाउँपालिकाले गाउँमै ग्रामीण अल्ट्रासाउण्ड कार्यक्रम कार्यान्व्यन गरी भिडियो एक्सरेको घुम्ती सेवा सञ्चालन सुरु गरिएको संयोजक शाहीले बताउनुभयो । भिडियो एक्सरे कार्यक्रम सुरु भएपछि गाउँका गर्भवतीका गर्भमा रहेको शिशु र आमा दुवैको स्वास्थ्य अवस्था जानकारी लिन सजिलो भएको अनमी सारधा फडेराले बताउनुभयो । प्रत्येक वडामा पुगेर सेवा दिन सुरु गरेसँगै गर्भावस्थामा हुनेसक्ने समस्याको समयमै पहिचान गरी उपचार गर्न सकिने भएको अनमी फडेराको भनाई थियो । यस्तै गाउँपालिकाले पहिलो पटक गर्भवती महिलाका लागि रगत परिक्षण पनि गरिएको छ । रगत परीक्षणका लागि सदरमुकाम धाउनु पर्नेको अन्त्य गर्दै गाउँमै यो सेवा दिन थालिएको गाउँपालिका संयोजक शाहीले बताउनुभयो । रगत परिक्षण र भिडियो एक्सरे सेवा दिन अनमी फडेरा र श्रीदेवी शाही खटिएका छन् । वडा एकदेखि पाँचसम्म यो सेवा दिइने भएको छ । भोली खर्पेगाउँ स्वास्थ्यचौकीबाट सेवा प्रदान गरिने भएको छ ।