गाउँपालिकाले सिल गर्यो सिमकोटमा सञ्चालीत तीन मेडिकल

सिमकोट । हुम्लाको सदरमुकाममा नियम विपरीत सञ्चालन हुँदै आएका तीन वटा निजि मेडिकल सिल गरिएको छ । सिमकोट गाउँपालिकाले वैशाख विस गते सिमकोटमा सञ्चालीत पाँचवटा निजी मेडिकलको अनुगमन गरेको थियो । अनुगमनका क्रममा गाउँपालिकाले मापदण्ड नपुगेका ती मेडिकललाई सबै प्रक्रिया पुरा गर्न तीन दिनको समय दिएको थियो । तर गाउँपालिकाले दिएको समयमा कागजात र फार्मेसी पढेका स्वास्थ्यकर्मी राख्न नसक्दा तीन वटा मेडिकल सिल गरिएको सिमकोट गाउँपालिका उपाध्यक्ष सुशिला रोकाया (भाम)ले बताउनुभयो । 

मेडिकलमा मनपरी औषधि बेचेको, एक व्यक्तिको लाइसेन्समा अर्को व्यक्तिले मेडिकल खोलेर बसेको, औषधि र क्लिनिकको अनुमति नलिइ सञ्चालनमा भेटिएका ती सबै मेडिकलले प्रक्रिया पुरा गर्न नसक्दा गाउँपालिकाले बन्द गरेको उपाध्यक्ष रोकाया (भाम)ले बताउनुभयो । गाउँपालिकामा दर्ता र अनुमति नलिएरै सञ्चालन गरिएका औषधि पसललाई बन्द गरिएको हो । गाउँपालिकाले भने अनुसार प्रक्रिया पुरा गर्न नसक्ने सिया मेडिकल हल, सि.पि. औषधि पसल र बुधे मेडिकल हल औषधि पसल सञ्चालमा बन्द गरिएको गाउँपालिका उपाध्यक्ष रोकाया (भाम)ले बताउनुभयो । बन्द गरिएका केही मेडिकलले यसअघि डाक्टरको अनुमनि विनाका औषधि विक्री गर्दै आएको पाइएको थियो ।