वर्षाले हुम्लामा क्षति गर्न सुरु

सिमकोट । विहिबार दिनभर देखि राती आएको अविरल वर्षाले हुम्लाको सिमकोट गाउँपालिका–७ मा रहेका तीनवटा वस्तिमा क्षति पुर्याएको छ । यस क्षेत्रमा आएको वर्षाले वडा नम्बर ७ डाँडाफया साविकको वडा नम्बर ५ को टुलिङ र दलित वस्ति चुकेडि गाउँमा ठूलो क्षति गरेको हो । यहाँ रहेका तीनवटा वस्ति जोखिममा रहेको स्थानीय तथा पत्रकार मन्दिर सिंहले बताउनुभयो । सिंहका अनुसार, विहिबार आएको वर्षाले बाढी आउँदा यस क्षेत्रका १५ वटा आलु, सिमी, कोदो लगाएको खेत बगाएका छन् । खेतमा लगाएको बाली समेत बगाएर लिएको सिंहले बताउनुभयो । 

टुलिङ र दलित चुकेडी गाउँका नागरीकले प्रयोग गर्दै आएका ४ वटा पानी घट्ट समेत बगाएर लिएको बताइएको छ । बाढीले ती घट्ट काम नलाग्ने गरी बगाएका छन् । यस्तै हिमाली शिक्षा र विकास हेड नेपालले सहयोग गरेको आउबीर सुनारको आधुनिक घट्ट समेत बगाएर लिएको छ । स्थानीयले पिस्नका लागि राखेको झण्डै दुई क्विइन्टल अनाज समेत बगाएर लिएको सुनारले बताउनुभयो । अविरल वर्षाले बाढी आउँदा यहाँका वस्ति जोखिममा रहेको सुनारको भनाई छ । टुलिङ र दलित वस्ति चुकेडी गाउँमा झण्डै ४० भन्दा बढी घरपरिवार बसोवास गर्दै आएको बताइएको छ । 

यस्तै सोही वडाको ओखरेलनमा आएको बाढीले खानेपानीको पाइप बगाएर थाया लगायतका गाउँमा खानेपानीको समस्या बनाएको सिंहले बताउनुभयो । यहाँ झण्डै ५० घरधुरी रहेका छन् । उनिहरुले प्रयोग गर्दै आएको खानेपानीको पाइप बगाएपछि टाढा गएर खानेपानीको जोहो गर्नु पर्ने अवस्था आएको छ । 

यस्तै वडा नम्बर ७ को जबुका गाउँमा समेत बालीनाली, खानेपानी पाइप, घट्ट लगायतमा क्षति गरेको अर्का स्थानीय विर बहादुर सिंहले बताउनुभयो । वर्षाले क्षतविक्षत गर्दा खानेपानीको समेत समस्या बनाएको सिंहले बताउनुभयो । खेतमा छर्किएर पलाउँदै गरेका बाली आल, सिमी, कोदो, फापर, गहुँ,भटमास, तोरी, लगायत तरकारी बाली गोपि,बन्दा लगायतका बालीमा क्षति बगाएर लिनुका साथै बगाएर लिएको सिंहले बताउनुभयो । अप्रत्यासित रूपमा परेको वर्षाले पहिलो पटक जिल्लाको डाँडाफयामा कृषि क्षेत्रमा ठूलो क्षति पुर्याएको उहाँले बताउनुभयो ।