टेलिफोन अवरुद्ध चार दिनदेखि चारवडाका सेवाग्राही मर्कामा

हुम्ला  । हुम्लाको खार्पुनाथ गाउँपालिका वडा नम्बर तीन रायाको ठानाकोटमा रहेको नमस्ते टेलिफोन सेवा अवरुद्ध हुँदा यहाँका चार वटाका वडाका सेवाग्राही मर्कामा परेका छन् । चार दिनदेखि नमस्ते टेलिफोन सेवाले काम गर्न छोड्दा यहाँका नागरीकले जिल्ला बाहिर र सदरमुकाम लगायत छिमेकी गाउँपालिकामा भएका आफन्तसँग टेलिफोनमा जोडिन नसकेको बताएका छन् ।

वडा नम्बर तीन रायाको ठानाकोटमा रहेको टावरका लागि जडान गरिएको सोलारको जस्ता पाताले काम नगर्दा टेलिफोन सेवा अवरुद्ध भएको यहाँका स्थानीयले बताएका छन् । गाउँमा एक मात्रै सञ्चारको माध्यम टेलिफोन भएपनि चार दिनदेखि नबन्दा यहाँका नागरीक अन्यत्र रहेका आफन्तसँग फोन सम्पर्कमा जोडिन नसकेका हुन् । यस्तै वडा नम्बर एक लाली, पिउस, वडा नम्बर दुई थाली, वडा नम्बर तीन राया, र वडा चार याङचु गाउँका सेवाग्राही टेलिफोन सेवाबाट बन्चित रहेका छन् ।

यी चारवटा वडाका झण्डै दुई हजार बढी सेवाग्राही मर्कामा परेका छन् । धेरै वर्ष पुराना सोलार भएकाले बेला बेलामा अवरुद्ध हुँदै आएको छ । टावर जडान गरिएको स्थानमा विद्युत पुगेको भएपनि टावरमा विद्युत जडानका लागि वडा र गाउँपालिकाले बेवास्ता गरेको यहाँका नागरीकको गुनासो छ । टावर सञ्चालनका लागि विद्युत जडान गरेपछि त्यसको विल कस्ले तिर्ने भन्दै वडाले जडान नगरेको बताइएको छ ।