पहिरो नियन्त्रणका लागि निर्माण गरिएको ग्याबिन महिना दिन नपुग्दै भत्कियो

सिमकोट । पहिरो नियन्त्रणका लागि निर्माण गरिएको ग्याबिन महिना दिन नपुग्दै भत्किएको छ । हुम्लाको सिमकोट गाउँपालिका –७ को डाडाफयाँ गाउँ स्थित चौख्या ढुङ्गा पहिरो नित्रयन्त्रका लागि निर्माण सम्पन्न भएको ग्याबिन केही दिनअघि आएको वर्षातले भत्काएको छ । आर्थिक वर्ष २०८०।०८१ म लिप्स प्रोजेक्ट नामक संस्थाले रु १६ लाखमा निर्माण गरेको उक्त स्थानको ग्याबिन भत्काएको हो । गाउँमा विकास निर्माणमा स्थानीय उपभोक्ताले गतिलो संरचना बनाउन नसक्दा वर्खायाममा आउने वर्षातले क्षति पुर्याउने गर्दछ ।

   निर्माण सम्पन्न भएको महिना दिन नपुग्दै केही दिनअघि आएको अविरल वर्षाले उक्त ग्याबिन भत्काएको वडाध्यक्ष बलविर शाहीले बताउनुभयो । प्राकृतिक रुपमा आइपर्ने यस्ता खाले विपतीलाई कसैले रोक्न नसक्ने वडाध्यक्ष शाहीले बताउनुभयो । केही दिन अघिको वर्षाले चौख्या ढुंगाको ग्याबिन मात्रै नभएर गाउँका नन्य घरहरुमा समेत क्षति पुगेको उहाँले बताउनुभयो । यस्तै डाडाफयामा रहेका खेतबारीमा समेत ठूलो क्षति पुर्याएको वडाध्यक्ष शाहीले बताउनुभयो ।

   उक्त स्थानमा पाँच छ वर्ष अघि तल्लो भागमा समेत ग्याबिन निर्माण भएको थियो । सोही स्थानमा लिप्स प्रोजेक्टले थप पहिरो नियन्त्रण जोखिम अन्त्य गर्नका लागि उक्त बजेट विनियोजित गरेको थियो । अहिले ग्याबिन भत्काउँदा यहाँका सर्वसाधरणलाई आवतजावतमा समेत समस्या बनाएको जानकारी प्राप्त भएको छ ।