टेलिफोन सेवा नियमीत गर्न पातिहाल्नमा विद्युत जडान सुरु 

सिमकोट । हुम्लाको सिमकोट गाउँपालिका–७ ओखरेनको पातिहाल्नमा रहेको नमस्ते टेलिफोन सेवा र फोरजी सेवा २४ सै घण्टा सुचारु गर्नका लागि विद्युत सेवा जडान कार्य सुरु भएको छ । 

   विद्युत सेवा जडानका लागि टासमिटर सुर्खेतबाट गाडीमार्फत पैदल भएर सिमकोट पुगेसँगै विद्युत सेवा जडानका लागि पातिहाल्नमा पठाएको सिमकोट गाउँपालिका अध्यक्ष विजय भण्डारी (प्रतिरोध)ले बताउनुभयो । खार्पुदोभानमा एक महिना रोकिएको टासमिटर शनिबार आफु गएर जिल्ला प्रहरी कार्यालयबाट प्रहरी, र खार्पु, दोजाम प्रहरीचौकीका प्रहरी परिचालन गरेर तीन सय पाँच क्विइन्टलको उक्त टासमिटर पुल तारेर ट्याक्टर मार्फत सिमकोट ल्याएको अध्यक्ष भण्डारीले बताउनुभयो । 

    आइतबार उक्त टासमीटर ट्याक्टरमा लोड गरी पातिहाल्नमा पुगिसकेको छ । यस्तै नेपाल विद्युत प्राधिकरण हुम्लाले टासमिटर राख्नका लागि दुईवटा विद्युत पोल पनि उपलब्ध गराएको छ । सुर्खेतदेखि सिमकोट हुँदै पातिहाल्न सम्मको ढुवानी भाडा उत्तरी नाम्खा र सिमकोट गाउँपालिकाले व्यहोर्ने भएको अध्यक्ष भण्डारीले बताउनुभयो । टासमिटर सहित प्राविधिकको टोली लिएर नाम्खा गाउँपालिका अध्यक्ष प्रेम बहादुर लामा त्यस तर्फ पुगेका छन् । 

   उक्त स्थानमा रहेको टावरले नाम्खाका तीन वटा वडा र सिमकोटका दुई वटा वडामा सेवा प्रवाह गरिरहेको छ । नाम्खा गाउँपालिकाका–१,२,३ र सिमकोट गाउँपालिका–७, ८ नम्बर वडाका नागरीकले टेलिफोन सेवाको उपभोग गर्दै आएका छन् । यस क्षेत्रमा जडान गरिएका जस्तापाता पुराना भएर काम नगर्दा नागरीकले टेलिफोन र फोरजीको हैरानी खेप्दै आएका थिए । घाम लागेको समय विहान दश र साँझ पाँच बजेसम्म काम गरेपनि अन्य समय बन्द हुँदै आएको थियो । 

विद्युत सेवा जडान भएपछि यहाँका सेवाग्राहीले नियमीत २४ सै घण्टा सेवा पाउने भएका छन् । टावर नियमीत सञ्चालन गर्नका लागि विद्युत सेवा जडानका लागि पहल गर्नुभएका सिमकोट गाउँपालिका अध्यक्ष भण्डारीलाई यहाँका नागरीकले धन्यवाद समेत दिएका छन् ।