यस्ता छन्, एमालेको आकस्मिक बैठकले गरेका निर्णय (विज्ञप्ती)

 काठमाडौं । नेकपा (एमाले) केन्द्रीय कार्यालयको आकस्मिक बैठक बसेको छ । पार्टी महासचिव शङ्कर पोखरेलको अध्यक्षतामा पार्टी मुख्यालय च्यासलमा बसेको बैठकले पछिल्लो सृजित विपत्तिलाई मध्यनजर गर्दै विभिन्न निर्णयहरू गरेको हो ।

बैठकले बाढीपहिरो लगायत विपद्बाट ज्यान गुमाउनु भएकाहरूप्रति श्रद्वाञ्जलीसहित शोक सन्तप्त परिवारजनमा समवेदना प्रकट गरेको छ । यसका साथै मृतक परिवारलाई राहत दिन, बेपत्ता भएकाहरूको अविलम्ब खोजी गर्न, घाइतेहरूको शीघ्र स्वास्थ्यलाभको कामना गर्दै निःशुल्क औषधि उपचार गर्न र घरबारविहीनहरूको तत्काल खोज, उद्धार, राहत र आवासको व्यवस्था गर्न सरकारको गम्भीर ध्यानाकर्षण पनि गराएको महासचिव पोखरेलद्वारा जारी विज्ञप्तिमा भनिएको छ ।

यस्तै एमालेले उद्वारमा खटिनु भएका तीनै निकायका सुरक्षाकर्मी साथै एमालेका स्थानीय कमिटी र जनसंगठनप्रति आभार व्यक्त गरेको छ भने विपतको घडीमा बाढी पहिरो र डुबानबाट प्रभावित भएका प्रदेश, जिल्ला र मातहतका पार्टी कमिटीहरूले निर्धारित कार्यक्रमहरू स्थगन गरी खोज, उद्धार र राहतका काममा सक्रियतापूर्वक लाग्न निर्देशन पनि दिइएको हो ।

बैठकले चाडवाडको मुखमा सडकमार्ग, पुल, विद्युत खानेपानी अवरूद्व भएका स्थानमा यथाशिघ्र सञ्चालनमा ल्याउन पनि एमालेले सरकारको ध्यानाकर्षण गराएको छ ।