योजना माग्ने र दिनेको होइन, सेवाग्राहीको हो ; मुख्यमन्त्री कडेल

सिमकोट । कर्णाली प्रदेशका मुख्यमन्त्री यामलाल कडेलले तीनै तहका सरकारबाट आउने योजनाहरु माग्ने र दिनेको नभएर सेवाग्राही जनताको भएको बताउनु भएको छ । 

कर्णाली प्रदेशको सरकारको नेतृत्व सम्हालेपछि पहिलो पटक हिमाली जिल्ला हुम्ला पुग्नु भएका एमाले स्थायी कमिटि सदस्य समेत रहनु भएका मुख्यमन्त्री कडेलले प्रदेशबाट विनियोजित योजनाहरु मैले अग्रीम रकम तिरेर ल्याएको भन्दै निजि उपभोक्ता समिति बनाउने र विकासको रकम कटौती थरेर लिने प्रवृति बढिरहेका बेला यस्तो बताउनु भएको हो । 

'पदभार ग्रहण गर्नासाथ मैले आप्mनो पहल कदमी गरेको छु । संविधानले दिएको भूमिकालाई मैले थप प्रधावकारी बनाउने काममा म लाग्छु र लागेको छु', मुख्यमन्त्री कडेलले भन्नुभयो, 'मैले सत्ता सम्हालेको दिनदेखि संघीय सरकारसँग कर्णालीका लागि चारवटा कुरा माग गरेको छु । कोहलपुर देखि सुर्खेतसम्मको सडक, सुर्खेतदेखि हुम्ला, सुर्खेतदेखि डोल्पा, कालिकोट देखि नाक्चेलाग्ना र सुर्खेतदेखि कर्णालीका जिल्लाहरुमा हुने नियमित हवाई उडान हुने पूर्वाधार निर्माणको कुरा मैले संघीय सरकारलाई भनिरहेको छु ।' 

संघ, प्रदेश र स्थानीय तहले गरेको भनेर विवाद गरिरहनु आवश्यक नरहेको उल्लेख गर्नुभएका मुख्यमन्त्री कडेलले हरेक सेवाग्राही नागरि र स्थानीय सरकारले जुन सरकारबाट आएका योजना भएपनि त्यसको पारदर्शिता र जवाफदेहितालाई ख्याल गरेर कार्यान्वयन गर्ने हो भने कर्णालीको विकास बजेटको भन्दा धेरै हुने दावी गर्नुभयो । 

प्रेस चौतारी हुम्लाले सिमकोटमा आयोजना गरेको पत्रकार सम्मेलनमा प्रदेश सरकारका अन्य दुई जना क्याविनेट मन्त्री सहित पुग्नु भएका मुख्यमन्त्री कडेलले चालु आर्थिक वर्षको बजेटमा आफू चाहेजती सुधार गर्न नसकेको कुरा स्विकार गर्नुभयो । 

प्रदेश सरकारबाट विनियोजित योजनाहरुको अनुगमन, प्रदेशका नीति निर्माण र कानूनी व्यवस्था लगायतका विषयमा हुम्लाका राजनीतिक दल, सरकारी कर्मचारी, नागरिक अगवाहरुसँगको छलफल तथा अनुगमनका लागि सिमकोट पुग्नु भएका मुख्यमन्त्री कडेल केहि दिन हुम्लामै रहेर विभिन्न स्थानहरुको अवलोकन गर्ने कार्यक्रम रहेको मुख्यमन्त्रीका स्वकिय सचिव घनश्याम पाण्डेले बताए । 
 
सिमकोट पुग्नु भएका मुख्यमन्त्री कडेललाई भौतिक पुर्वधार मन्त्री सेरबहादुर बुढा, जलस्रोत तथा उर्जा मन्त्री बिजय बोहरा, एमालेका नेता तथा कार्यकर्ता, सरकारी कर्मचारी, सुरक्षाकर्मी र हुम्लाका नागरिकले सांस्कृतिक झाँकीसहित स्वागत गरेका छन् ।
 प्रदेश सरकारका पूर्वाधार मन्त्री बुढा दुई दिन अघि र जलस्रोत मन्त्री बोहरा आजै सिमकोट पुग्नु भएको बताइएको छ ।