सर्केगाड उपनिर्वाचनका लागि सर्वदलिय बैठक सम्पन्न 

सिमकोट । आगामी मंसिर १६ गते हुन गैरहेको सर्केगाड गाउँपालिका उपाध्यक्ष पदको उपनिर्वाचनको लागि सर्बदलिय बैठक सम्पन्न भएको छ । 

मुख्य निर्वाचन अधिकृत शम्भु प्रसाद बरालको अध्यक्षतामा आइतबार बसेको बैठकले मंसिर १६ गते हुने उपनिर्वाचनका आचार संहिताको अनुगमन तथा निर्वाचन व्ययवस्थापन लगायतका विषयहरुमा निर्वाचनमा सहभागि दलहरुबीच छलफल भएको निर्वाचन अधिकृतको कार्यालयले जनाएको छ । 

बैठकमा सहभागि जिल्लाका राजनितिक दलहरुले उपनिर्वाचनलाई निष्पक्ष र स्वच्छ वातावरणमा सम्पन्न गर्न आफूहरु प्रतिवद्ध भएको बताएका छन् । 

निर्वाचनमा सहभागि भएका सबै दलहरुले उपनिर्वाचन २०८१ सम्बन्धि ऐन कानुन र निर्देशिकामा उल्लेख भए बमोजिमका आचार संहिता पालना गर्ने निर्णय समेत गरेको मुख्य निर्वाचन अधिकृत बरालले जानकारी दिनुभयो । 

उप-निर्वाचन अवधिभर शान्ति सुरक्षामा खलल पुग्ने कुनैपनि कार्य राजनितिक दल बाट हुन नदिने गरेर सामुहिक रुपमा राजनितिक दलहरुलाई प्रतिबद्धता जाहेर भएको छ, मुख्यनिर्वाचन अधिकृत बरालले भन्नुभयो, सर्बदलिय बैठकमा उपनिर्वाचन आचारसंहिता, निर्वाचन कानूनका बारेमा दलहरुलाई जानकारी गराउने काम भयो । 

मतदान हुन एकसाता मात्र बाँकी रहेको अवस्थामा आयोजित बैठकमा उपनिर्वाचनमा सहभागि जिल्लाका सबै राजनितिक दलका प्रमुख र स्वतन्त्र उम्मेरदवारका प्रतिनिधिहरुको सहभागिता  रहेको थियो ।