हुम्लामा मनाइयो माघी पर्व

सिमकोट । हुम्लाको खार्पुनाथ गाउँपालिका–५ खार्पुदोभानमा माघी पर्व धुमधामका साथ मनाइएको छ । सोमबार राती खार्पुदोभानको शिवालयमा हजारौ भक्तजन पुगेर दर्शन गरेको जानकारी प्राप्त भएको छ ।

    माघी पर्व दर्शनका लागि सदरमुकाम सिमकोट सहित आसपासका गाउँबाट ठूलो मात्रामा भक्तजन त्यस यहाँ पुगेका थिए । मानसरवरबाट बग्ने कर्णाली नदिको खार्पु दोभान तीर्थस्थलमा श्रद्धालु भक्तजनको ठूलो उपस्थिति सहित माघी पर्व रमझम गरी मनाइएको खार्पुनाथ शिवलय समिती अध्यक्ष हरिभक्त शाहीले जानकारी दिनुभयो । करीब दुई हजार बढी भक्तजनले खार्पु मन्दिरमा रहेको ऐतिहासिक शिवालयमा पुगेर दर्शन गरेको शाहीले बताउनुभयो । खार्पुमन्दिर भित्र सयौँ वर्ष पुरानो गुफा रहनुका साथै त्यहाँ माघी १ गते दर्शन गर्दा आफूले चिताएको मनोकांक्षा पूरा हुने धार्मिक विश्वास छ । मन्दिर परिशर क्षेत्रमा यो वर्ष शिवको ठूलो मन्दिर समेत निर्माण गरिएको छ । 

    सिमकोट र खार्पुनाथ गाउँपालिकाबाट तीर्थालु भक्तजन खार्पुनाथ मन्दिर दर्शन गर्न जान्छन् । रातभर आगो बालेर खार्पुनाथ मन्दिर परिसरमा फाक, चाँचि,शिवको भजन गाएर आन्नद लिने गरिन्छ । हरेक उम्मेरसमुहका समुह समुह देउडा नृत्यसहित युवाले रमाइलो गरी यो पर्व मनाउने प्रचलन रहेको अध्यक्ष शाहीले बताउनुभयो । आजबाट दिनभन्दा रात छोटा हुँदै जान्छन् भन्ने मान्यता छ । 

    पुसको अन्तिम दिन रातभर जाग्राम बसेर रमाइलो गरी माघीका दिन १ गते मङ्गलबार बिहानै स्नान, दान, एवम् खानपिन र रमाइलो गरेर माघी पर्व मनाएको शाहीले बताउनुभयो । हिउँदयामको कठ्याङग्रीदो चिसोको कुनै प्रवाह नगरी जलाशयमा गई स्नान, पूजा गरी ठूला बडाकहाँ गएर आशीर्वाद लिने परम्परा छ । गएराती तीन बजेबाट शिबालय मन्दिरको भक्तजनले दर्शन गरेका थिए ।

    यस्तै जिल्लाको सर्केगाड गाउँपालिका–२ रिप र ३ उनापानी गाउँमा माघी पर्वको दिन दिनभर देउडा खेलेर रमाइलो गरिरहेको जानकारी प्राप्त भएको छ । वडाले देउडा खेलको आयोजनामा गर्नुका साथै प्रतिस्पर्धीलाई पुरस्कारको समेत व्यवस्था गरेको छ । एक आपासमा विभिन्न उमेर समुहका मिलेर देउडा खेली रहेको रिप गाउँका मनपुरा कार्कीले बताउनुभयो । यस्तै तरुलको विभिन्न परिकार बनाएर एक आपासमा मिलेर खानुका साथै रमाउने गरेको कार्कीले बताउनुभयो । यस्तै गाउँ नजिक रहेको पधेरामा विहानै गएर स्नान गर्ने गरेको बताइएको छ ।