हुम्लामा डेमो प्रदर्शन गरी मनाइयो २७ औं राष्ट्रिय भूकम्प सुरक्षा दिवस मनायो

सिमकोट । हुम्लाको सदरमुकाम सिमकोटमा बुधबार कृतिम अभ्यास (डेमो) प्रदर्शन गरी २७ औं राष्ट्रिय भूकम्प सुरक्षा दिवस मनाएको छ । जिल्ला समिति हुम्लाको आयोजनामा सिमकोट माथिल्लो बजारमा रहेको बालमन्दिर माध्यामिक विद्यालयमा जनचेतनामूलक कार्यक्रम गरी भूकम्प सुरक्षा दिवस मनाइएको हो । नेपाली सेना, सशस्त्र प्रहरी बल, नेपाल प्रहरीले भूकम्पमा आधारित कृतिम अभ्यास गरी यो दिवस मनाएको जानकारी प्राप्त भएको छ ।

तीनवटै सुरक्षाकर्मीले भूकम्प आउँदा कसरी कच्ने, भूकम्प आइसकेपछि कसरी बच्च सकिन्छ, खोज, उद्धार र राहत लगायतका विषयमा कृतिम अध्यास गरेको प्रमुख जिल्ला अधिकारी नारायाण् पाण्डेयले बताउनुभयो । २०५५ सालदेखि वि.सं. १९९० सालको महाभूकम्पको स्मृतिमा माघ २ गतेलाई भूकम्प सुरक्षा दिवसको रुपमा मनाउने गरिन्छ । भूकम्प सुरक्षा दिवसको अवसरमा बुधवार बिहान सदरमुकाम सिमकोटमा भूकम्प स्मृति तथा भूकम्पीय पूर्वतयारी सचेतना प्रभातफेरी गरिएको हो । भूकम्प सुरक्षा दिवसको अवसरमा आयोजित कार्यक्रमलाई सम्बोधन गर्दै नेपाल रेडक्रश जिल्ला शाखा हुम्लाका अध्यक्ष गणेश महतले भूकम्प प्रतिरोधी संरचना निर्माण गर्नुपर्नेमा जोड दिनुभयो । हिमाली जिल्लामा भूकम्प प्रतिरोधात्म भवन, संरचनाहरु नभएको बताउनुभयो । भूकम्पले सिकाएको पाठः बलियो संरचना र सुदृढ पूर्वतयारीका साथ भन्ने नारासहित हुम्लामा भूकम्प सुरक्षा दिवस मनाइएको छ ।

भूकम्पबाट सुरक्षित रहन सुदृढ पूर्वतयारी गर्नुपर्ने र हाम्रा घर संरचनाहरु पनि बलियो बनाउनुपर्ने भूकम्पको मुख्य पाठ रहेको प्रमुख जिल्ला अधिकारी पाण्डेयले बताउनुभयो । विगतका भूकम्पबाट सिकेको पाठ भूकम्पीय जोखिम न्यूनीकरण गर्नुपर्छ भन्ने हो, उहाँले भन्नुभयो, ‘यसका लागि हामीले बनाउने संरचनाहरु भूकम्प प्रतिरोधि हुनैपर्छ । भूकम्पको सम्भाव्य अवस्थालाई पूर्वआंकलन गरी प्रभावकारी र द्रुत खोज तथा उद्धार, सीपयुक्त र तालिम प्राप्त उद्धारक एवम् तत्काल राहतको आवश्यकतालाई समेत तयारी अवस्थामा राख्नु पनि उत्तिकै आवश्यक रहेको प्रजिअको भनाई थियो । सम्भावित धनजनको क्षति न्यूनीकरणका लागि पूर्वतयारी र पूर्वसूचना प्रणालीको विकासलाई प्राथमिकता दिनुपर्ने उहाँको जोड छ ।

यो दिवसमा जिल्ला स्थित विभिन्न सरकारी तथा गैरसरकारी कार्यालयका प्रमुख प्रतिनिधि, सुरक्षाकर्मी, सञ्चारकर्मी लगायतको उपस्थित रहेको थियो ।