दुई सय साठी कृषकलाई तरकारी विउ सहयोग

सिमकोट । हुम्लाको सिमकोट र खार्पुनाथ गाउँपालिकाका लक्षित वर्गका कृषकलाई निःशुल्क तरकारी विउ वितरण गरिएको छ । लामो समयदेखि जिल्लामा कृषि, स्वास्थ्य, शिक्षा लगायत विभित क्षेत्रमा काम गर्दै आएका दुई संस्थाले तरकारी विउ वितरण गरेका हुन् । 

   गुडनेवर्स इन्टरनेशल नेपालको आर्थिक सहयोग र स्नोल्याण्ड एकिकृत विकास केन्द्र हुम्लाको सहकार्यमा सिमकोट गाउँपालिका वडा नम्बर दुई ठेहे, वडा नम्बर चार हिल्दुम, बुराउसे, पाँच तल्लो गाउँ र वडा नम्बर ६ माथिल्लो गाउँका कृषकलाई तरकारी विउ वितरण गरिएको हो । 

    मष्टदेव कृषि सहकारी संस्था ठेहेमा आवद्ध पचास जना, पञ्चमुखी दुधेदह कृषि सहकारी संस्था सिमकोट तल्लो गाउँ, माथिल्लो गाउँ, हिल्दुम र बुराउँसेका ८४ जना कृषकलाई यो मौसमी सिजनमा उत्पादन हुने विभिन्न प्रकारका तरकारीका विउ निःशुल्क वितरण गरिएको स्नोल्याण्ड एकिकृत विकास केन्द्र हुम्लाका सहकारी व्यवसायी विकास अधिकृत रमेश बहादुर शाहीले जानकारी दिनुभयो ।

     यस्तै खार्पुनाथ गाउँपालिका वडा नम्बर चारमा रहेको दुधकुण्ड महिला विकास बहूदेशिश्य सहकारी संस्थामा आवद्ध माजा, छिप्रा र नल्ना गाउँका एक सय छब्बीस किसानलाई पनि तरकारीका विउ वितरण गरिएको सोही संस्थाका सहकारी व्यवसायी विकास अधिकृत शाहीले बताउनुभयो । 

     सिमकोट र खार्पुनाथ गाउँपालिकामा रहेका कृषकलाई दोस्रो सिजनको लागि आवश्यक पर्ने बन्दा,काउली, टमाटर, प्याज, फर्सि, गाँजर, धनियाँ र काख्रा गरी आठ प्रकारका विउविजन निःशुल्क वितरण गरिएको शाहीले जानकारी दिनुभयो । 

    एकिकृत सामुदायिक विकास परियोजना अन्तर्गत प्रवद्र्धित सहकारी संस्थामा आवद्ध रहेका कृषकहरुको जिविकोपार्जन सुधार वातावरण मैत्री तवरले तरकारी उत्पादन गरी उत्पादकत्व बढाउनको लागि विभिन्न आठ प्रकारका विउविजन वितरण गरिएको उहाँले बतानुभयो ।