उच्च पाटन रानीशैना पुगेर बालबालिकालाई खोप

सिमकोट । हुम्लाको सिमकोट गाउँपालिका–८ स्याडा स्वास्थ्यचौकीको स्वास्थ्यकर्मीको टोली जिल्लाको उच्च पाटन चौरी खर्कमा पुगेर ६ बालबालिकालाई विभिन्न किसिमको खोप लगाइएको छ । सिमकोट गाउँपालिका स्वास्थ्य शाखाको खर्कमा रहेका बालबालिकाका लागि घुम्ती खोप शिविर अभियान अन्तरगर्त रानीसैनामा रहेका स्याडा गाउँका सहित उत्तरी नाम्खा, ताँजकोट र बाजुरा जिल्लाका त्यस क्षेत्रमा रहेका पाँच बालक र एक बालिकालाई खोप लगाइएको हो । ६ महिनादेखि १५ महिना मुनीका ती बालबालिकालाई बिसिजी, डिपीटी, पिसीभी, पोलियो, रोटा, जेइ र एफआइपिभि रुबेला टाइफाइडलगायत आदि रोगविरुद्धको खोप लगाइएको स्याडा स्वास्थ्यचौकीका अहेब राजेश थापाले जानकारी दिनुभयो । 

  झण्डै चार हजार मिटर अग्लो पाटन चौरी खर्क रानीसैनामै पुगेर बालबालिकाका लागि खोप कार्यक्रम सञ्चालन गरेको अहेब थापाले जानकारी दिनुभयो । भदौ १७ गतेदेखि २२ गतेसम्म रानीशैनामा खोप सहित स्वास्थ्य शिविर सञ्चालन भएको थियो । 

   वर्षाको समयमा खर्क तथा अग्लो लेकमा चौँरीगाईसहित अन्य पशुवस्तु चरिचराउका लागि लैजानुका साथै खर्कमा बालबालिका र गोठाला जाने भएकाले उनीहरूको उपचारका लागि घुम्ती शिविर सञ्चालन गरेको सिमकोट गाउँपालिका स्वास्थ्य संयोजक नर बहादुर भण्डारीले बताउनुभयो । रानीशैना खर्कमा गोठाला बसेका ४३ जना गोठालाको स्वास्थ्य जाँच सहित औषधि उपचार गरिएको संयोजक भण्डारीले बताउनुभयो । २० महिला र २३ पुरुष गरी ४३ जनाको उपचार गरिएको संयोजक भण्डारीले बताउनुभयो । 

  स्याडा गाउँका र नाम्खा, ताँजकोट गाउँपालिका सहित छिमेकी बाजुरा जिल्लाका रानीशैनामा पुगेका गोठाला, जडिबुटी खन्न पुगेका नागरीकहरुको उपचार गरिएको उहाँले बताउनुभयो । रानीशैनामा हुम्लाका मात्रै नभएर बाजुरा जिल्लाका नागरीक पनि यहाँ पुगेका छन् । घुम्ती शिविरमा स्याडा स्वास्थ्यचौकी इन्चार्ज लवी रावतको नेतृत्वमा स्वास्थ्यकर्मीको टोली खटिएको थियो । 

   बर्खायामको झरीसँगै कठिन यात्रामा खटिई सेवा प्रदान गर्ने स्वास्थ्यकर्मीलाई गाउँपालिका र स्वास्थ्य शाखाले धन्यवादसमेत दिएको छ । गत वर्ष पनि सिमकोट गाउँपालिका स्वास्थ्य शाखाले आफ्नो पालिका भित्र रहेका उच्च पाटनमा पुगेका बालबालिका र नागरीक स्वास्थ्य उपचारबाट कोही नछुटुन भनेर घुम्ती शिविर सञ्चालन गरेको थियो ।