सर्केगाड उपाध्यक्षमा माओवादी तिमिल्सिना विजयी

सिमकोट । हुम्लाको सर्केगाड गाउँपालिकाको उपाध्यक्ष पदका लागि भएको स्थानीय तहको उपनिर्वाचनमा नेकपा माओवादी केन्द्रकी देवकी तिमिल्सिना विजयी हुनु भएको छ । नेपाली कांग्रेसका उम्मेदवार सविता बुढालाई पछि पार्दै माओवादी उम्मेदवार तिमिल्सिनाले ४३ मतको अन्तरले विजयी हुनु भएको हो । 

   सर्केगाडमा जम्मा ६ हजार आठ सय १० मतदाता रहेकामध्ये ४ हजार पाँच सय २४ मत खसेको थियो । तिमल्सिनाले १ हजार ६ सय ३७ मत ल्याएर विजय हासिल गर्नुभएको हो । उहाँकी निकटतम् प्रतिद्धन्द्धी नेपाली कांग्रेसकी सबिता बुढाले १  हजार पाँच सय ९४, नेकपा एमालेकी जाना शाहीले १ हजार एक सय ३२, राष्ट्रिय प्रजातन्त्र पार्टीकी संगिता शाहीले ५१, राष्ट्रिय स्वतन्त्र पार्टीकी बाँचा बुढाले २५ र स्वतन्त्र उम्मेद्वार नरेश शाहीले ९ मत प्राप्त गर्नुभया । खसेका मतमध्ये ७७ मत बदर भएका छन् । मुख्य निर्वाचन अधिकृतको कार्यालयले घोषणा भने गरेको छैन ।

   २०७९ सालमा कांग्रेस र माओवादी केन्द्रले मिलेर चुनाव लडेका थिए । त्यसबेला गठबन्धनबाट कांग्रेसका रोकाया अध्यक्ष र माओवादीका चन्द्रसिंह कार्की उपाध्यक्षमा निर्वाचित हुनु भएको थियो । उपाध्यक्ष कार्कीको गत भदौ ४ गते गाडी दुर्घटनामा परेर निधन भएसँगै रिक्त पदमा उपनिर्वाचन भएको हो । 

   २०७९ मा भएको स्थानीय तहको निर्वाचनमा माओवादी केन्द्रबाट चन्द्रसिंह कार्कीले उपाध्यक्षमा चुनाव जित्दा ३ हजार २ सय ६९ मत पाउनु भएको थियो । एमालेकी जुनकुमारी फडेरा १ हजार ६४ मत ल्याएर उपविजेता भएकी हुनु भएको थियो । 

  अध्यक्षमा कांग्रेसका रोकाया ३ हजार ५ सय ४३ मत प्राप्त गरी विजयी हुँदा एमालेका ज्ञामी बुमीले ९ सय ९७ मत पाउनु भएको थियो । आठ वडामध्ये माओवादी तीन, कांग्रेस दुई, एमाले दुई र एक वडा स्वतन्त्रले जत्ुिन भएको थियो । 

  २०७४ को निर्वाचनमा सर्केगाडमा एमाले–माओवादी गठबन्धन भएको थियो, जसमा एमालेले अध्यक्षमा माओवादीलाई र माओवादीले उपाध्यक्षमा एमालेलाई सघाएको थियो । त्यसबेला १ हजार ९ सय २० मतका साथ माओवादीका कृष्ण रोकाया विजयी हुँदा कांग्रेसका मंगलबहादुर शाही पराजित हुनु भएको थियो । शाहीले १ हजार ७ सय ७५ मत प्राप्त गर्नुभएको थियो । २०७४ र २०७९ मा पालिका अध्यक्ष र उपाध्यक्षमा गठबन्धन भए पनि वडामा भने तीनै दलबीच प्रतिस्पर्धा हुँदै आएको छ ।

निर्वाचीत देवकीको राजनितिक यात्रा

निर्वाचित भएकी तिमल्सिनाले माओवादीले थालेको सशस्त्र युद्धकै बेला रेडियो गणतन्त्रमा काम गरेकी थिइन् । पार्टीमा समीक्षा नामले चिनिने उनी साहित्यकार, लेखक तथा ग्रामीण समाजको गहिरो अध्ययन गरेकी महिला नेतृ हुन् ।

सर्केगाड नगरपालिका–८, रादेउ निवासी देवकीले विभिन्न संघ, संस्थाहरूको विभिन्न पदमा रहेर अनुभव बटुलेकी छन् । पोलिटिकल साइन्समा एमए गरेकी उनी हाल माओवादी केन्द्र कर्णाली प्रदेश कमिटी सदस्य छिन् ।

मुख्यमन्त्री रोजगार कार्यक्रम कर्णाली प्रदेशको राष्ट्रिय सल्लाहकार समेत रहेर कर्णालीको समाज र यहाँको आवश्यकताबारे जानकार छिन् । कर्णाली साहित्य समाजको उपाध्यक्ष समेत भइसकेकी उनी पूर्व पत्रकार हुन्, उहाँले रेडियो गणतन्त्र नेपालमा २०६० देखि ०६३ सम्म काम गरेकी थिइन् ।

यस्तै उनले नौलो जनसन्देश दैनिक नेपालगञ्जको संवाददाता, नयाँ कर्णाली मासिक पत्रिकाको कार्यकारी सम्पादक, रेडियो मिरमिरेमा रेडियो पत्रकारका रूपमा काम गरेकी थिइन् । माओवादीको मुखपत्र जनादेश दैनिकमा समेत काम गरिन् उनले । उनले लैङ्गिक समानता, सामाजिक रूपान्तरणका विभिन्न तालिमहरू लिएर समाजको गहिरो अध्ययन गरिरहेकी छन् ।